సింధు ముందుకు.. సైనా ఇంటికి

చైనాలోని వుహన్‌లో జరుగుతున్న బ్యాడ్మింటన్ ఆసియా చాంపియన్‌షిప్స్‌లో భారత స్టార్ షట్లర్లు పి.వి. సింధు, సైనా నెహ్వాల్‌లకు మిశ్రమ ఫలితాలు వచ్చాయి. మహిళల సింగిల్స్ తొలి రౌండ్‌లో పి.వి. సింధు విజయం సాధించగా.. సైనా ఓటమి చవిచూసింది. ఇండోనేషియాకు చెందిన దినాల్ ద్యా అయుస్టైన్‌పై రెండు వరుస సెట్లలో విజయం సాధించిన పి.వి. సింధు రెండో రౌండ్లోకి దూసుకెళ్లింది. అయితే సైనా నెహ్వాల్ మాత్రం తొలి రౌండ్‌లోనే ఇంటి దారి పట్టింది. జపాన్‌కు చెందిన అనామక ప్లేయర్ సయాక సాతో చేతిలో సైనా ఓడిపోయింది.

అన్‌సీడెడ్ ప్లేయర్‌ దినాల్‌తో పోటీ పడిన పి.వి. సింధు కేవలం 31 నిమిషాల్లో ఆటను ముగించింది. 21-8, 21-18 తేడాతో దినాల్‌ను సింధు ఓడించింది. మరోవైపు జపాన్ క్రీడాకారిణి సాతో చేతిలో 21-19, 16-21, 18-21 తేడాతో సైనా ఓడిపోయింది. గతంలో వీరిద్దరూ ఏడు సార్లు తలపడగా.. సైనా విజయం సాధించడం గమనార్హం.

ఇక పురుషుల సింగిల్స్‌లో భారత ఆటగాడు అజయ్ జయరామ్ రెండో రౌండ్లోకి ప్రవేశించాడు. చైనా ఆటగాడు తియాన్ హొవాయి‌ను 21-18, 18-21, 21-19 తేడాతో జయరామ్ ఓడించాడు. కాగా, నాలుగో సీడ్‌గా బరిలోకి దిగిన పి.వి. సింధు తన జోరును కొనసాగిస్తోంది.

రియో ఒలింపిక్స్‌లో సిల్వర్ మెడల్ గెలిచినప్పటి నుంచి సింధు ప్రదర్శన అద్భుతంగా ఉంది. ఈ ఏడాది మొదట్లో సయ్యద్ మోడీ గ్రాండ్ ప్రి, ఇండియా సూపర్ సిరీస్ టైటిల్‌ను సొంతం చేసుకున్న సింధు.. సింగపూర్ ఓపెన్‌లో క్వార్టర్ ఫైనల్ వరకు వెళ్లింది. మరోవైపు సైనా నెహ్వాల్ ప్రదర్శన మాత్రం ఈ మధ్య కాలంలో బాగాలేదు.