ప్రతీకారం.. కొరియా ఓపెన్ విజేత సింధు

మూడు వారాల క్రితం వరల్డ్ బ్యాడ్మింటన్ ఛాంపియన్‌షిప్స్‌ ఫైనల్లో ఎదురైన పరాభవానికి పీవీ సింధు ప్రతీకారం తీర్చుకుంది. మళ్లీ అదే ప్రత్యర్థితో జరిగిన కొరియా ఓపెన్ ఫైనల్లో విజయం సాధించి కెరీర్‌లో మూడో సూపర్ సిరీస్ టైటిల్‌ను సొంతం చేసుకుంది. అందరూ ఊహించినట్లే కొరియా ఓపెన్ సూపర్ సిరీస్‌ ఫైనల్లో జపాన్ క్రీడాకారిణి నజొమి ఒకుహర, తెలుగు తేజం సింధు మధ్య పోరు హోరాహోరీగా సాగింది. తొలి గేమ్‌ను సింధు గెలుచుకోగా.. రెండో గేమ్‌ను ఒకుహర సునాయాసంగా నెగ్గింది. దీంతో నిర్ణయాత్మక మూడో గేమ్ హోరాహోరాగా సాగింది. భారీ ర్యాలీలు ఆడుతూ ఇద్దరు ప్లేయర్లు తమ అత్యుత్తమ ఆటను ప్రదర్శించారు. కానీ చివరికి సింధునే విజయం వరించింది.

సియోల్‌లో ఆదివారం జరిగిన కొరియా ఓపెన్ ఫైనల్‌లో నజమి ఒకుహరపై 22-20, 11-21, 21-18 తేడాతో సింధు విజయం సాధించింది. 1 గంటా 24 నిమిషాల పాటు సుదీర్ఘంగా సాగిన ఫైనల్‌లో సింధు పైచేయి సాధించింది. దీంతో కొరియా ఓపెన్ సిరీస్‌ టైటిల్ నెగ్గిన తొలి భారత క్రీడాకారిణిగా సింధు చరిత్ర సృష్టించింది. సింధు విజయం పట్ల ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఆనందం వ్యక్తం చేశారు. ఆమెకు అభినందనలు తెలుపుతూ ట్వీట్ చేశారు.

పీవీ సింధు విజయంపై జాతీయ బ్యాడ్మింటన్ చీఫ్ కోచ్ పుల్లెల గోపీచంద్ ప్రత్యేకంగా తెలుగు సమయం వెబ్‌సైట్‌తో మాట్లాడారు. ‘అద్భుతమైన మ్యాచ్. ఇద్దరు క్రీడాకారిణులు క్రీడాస్ఫూర్తి చాటుతూ చాలా అంకితభావంతో ఆడారు. ఈ పోరు ఇటీవల ముగిసిన ప్రపంచ బ్యాడ్మింటన్ ఛాంపియన్‌షిప్ ఫైనల్‌ని తలపించింది. కానీ.. ఈ సారి ఫలితం భారత్‌కి అనుకూలంగా వచ్చింది. అయితే.. ఇక్కడ ఇద్దరూ ఛాంపియన్లే’ అని కోచ్ ఆనందం వ్యక్తం చేశారు.
Congratulations to @PVSindhu1 on winning the Korean Open Super Series & flying the tricolor high yet again. What a remarkable victory! — N Chandrababu Naidu (@ncbn) September 17, 2017