పీవీ సింధు మెచ్చిన టాలీవుడ్ హీరో..?

నిత్యం బ్యాడ్మింటన్ కోర్టులో బిజీగా గడిపే పీవీ సింధుకీ సినిమాలన్నా ఆసక్తేనట. ఖాళీ సమయం దొరికితే ఈ స్టార్ షట్లర్ తెలుగు సినిమాలతో పాటు హిందీ సినిమాలను కూడా చూస్తూ ఎంజాయ్ చేస్తుందట. తాజాగా ఒక మీడియాకి ఇచ్చిన ఇంటర్వ్యూలో పీవీ సింధు అభిమానులకి తెలియని కొన్ని ఆసక్తికరమైన విషయాల్ని వెల్లడించింది. ఇటీవల ముగిసిన ప్రపంచ బ్యాడ్మింటన్ ఛాంపియన్‌షిప్‌లో ఫైనల్‌కి చేరిన సింధు రజత పతకం గెలిచిన విషయం తెలిసిందే.

టాలీవుడ్ హీరోల్లో.. బాహుబలి సినిమా‌‌తో ప్రపంచవ్యాప్తంగా అభిమానుల్ని సంపాదించుకున్న ప్రభాస్ అంటే పీవీ సింధుకి తెగ ఇష్టమట. అతనితో పాటు సూపర్ స్టార్ మహేష్ బాబు సినిమాలని కూడా తాను చూస్తుంటానని సింధు వెల్లడించింది. హీరోయిన్లలో సమంత అంటే ఇష్టమని.. బాలీవుడ్ హీరోల్లో రణవీర్ సింగ్, రణబీర్ కపూర్, హీరోయిన్ దీపికా పదుకొణె నటన తనకు నచ్చుతుందని సింధు వివరించింది. సినిమాలన్నీ థియేటర్లలోనే తాను చూస్తానని.. అక్కడ ప్రేక్షకుల నుంచి ఇబ్బందులు రాకుండా ఉండేందుకు.. సినిమా ముగింపులో లైట్స్ వేయకముందే థియేటర్‌ నుంచి తాను వెలుపలికి వచ్చేస్తానని వెల్లడించింది.