సయ్యద్ మోడీ గ్రాండ్ ప్రి గోల్డ్ టైటిల్ నెగ్గిన సింధు

రియో ఒలింపిక్స్‌లో కాంస్య పతకం గెలిచిన తెలుగు షట్లర్ పి.వి. సింధు కెరీర్‌లో తొలి సయ్యద్ మోడీ గ్రాండ్ ప్రి గోల్డ్ టైటిల్‌ను గెలుచుకుంది. ఆదివారం లక్నోలో జరిగిన మహిళల సింగిల్స్ తుదిపోరులో సింధు ఇండోనేసియాకు చెందిన గ్రెగోరియా మారిస్కాపై 21-13, 21-14 తేడాతో విజయం సాధించింది. కొంతకాలంగా మంచి ఫాంను కొనసాగిస్తున్న సింధు గతేడాది చైనా ఓపెన్ ద్వారా తొలి సూపర్ సిరీస్ ప్రీమియర్ టైటిల్‌ను గెలుచుకుంది. అలాగే హాంగ్ కాంగ్ ఓపెన్‌లో ఫైనల్ వరకు వెళ్లింది.

మరోవైపు ఆల్ ఇండియన్ ఫైనల్‌ పురుషుల సింగిల్స్ టైటిల్‌ను సమీర్ వర్మ సొంతం చేసుకున్నాడు. ఫైనల్‌లో సాయి ప్రణీత్‌పై 21-19, 21-16 తేడాతో వర్మ విజయం సాధించాడు. మిక్సిడ్ డబుల్స్ టైటిల్‌ను ప్రణవ్ చోప్రా, సిక్కి రెడ్డి జంట గెలుచుకుంది. తుదిపోరులో సుమీత్ రెడ్డి, అశ్విని పొన్నప్ప జోడిపై 22-20, 21-10 తేడాతో చోప్రా, సిక్కి జంట గెలుపొందింది.