ఫెదరర్‌దే ఆస్ట్రేలియన్ ఓపెన్

ఆస్ట్రేలియన్ ఓపెన్ తుది సమరంలో స్పెయిన్ బుల్ రఫెల్ నాదల్‌పై స్విస్ దిగ్గజం రోజర్ ఫెదరర్ పైచేయి సాధించాడు. భారత కాలమానం ప్రకారం ఆదివారం సాయంత్రం జరిగిన పురుషుల సింగిల్స్ ఫైనల్‌లో నాదల్‌పై ఫెదరర్ గెలిపొందాడు. ఐదు సెట్లపాటు హోరాహోరీగా సాగిన మ్యాచ్‌‌ను 6-4, 3-6, 6-1, 3-6, 6-4 తేడాతో ఫెదరర్ చేజిక్కించుకున్నాడు. చివరి వరకు నాదల్ నుంచి గట్టి పోటీని ఎదుర్కొన్న ఈ 35 ఏళ్ల యోధుడు కెరీర్‌లో 18వ గ్రాండ్ స్లామ్‌ను సొంతం చేసుకున్నాడు.

సుమారు 10 ఏళ్ల తరవాత ఓ గ్రాండ్ స్లామ్ ఫైనల్‌లో నాదల్‌ను ఫెదరర్ ఓడించడం ఇదే తొలిసారి. కాగా, ఇప్పటి వరకు 14 గ్రాండ్ స్లామ్ టైటిళ్లు నెగ్గిన నాదల్ పీట్‌ సంప్రాస్‌ (14) సరసన నిలిచాడు. ఒకవేళ ఈ మ్యాచ్‌లో గెలిచి ఉంటే సంప్రాస్‌ను వెనక్కినెట్టి ఆల్‌టైమ్‌ అత్యధిక టైటిళ్ల జాబితాలో ఫెదరర్‌ తర్వాత స్థానంలో నిలిచేవాడు. అయితే ఇప్పటివరకు ఫెదరర్, నాదల్ పన్నెండుసార్లు గ్రాండ్‌స్లామ్‌ టోర్నీలో తలపడగా నాదల్ తొమ్మిదింట్లో గెలిచాడు. చివరిగా 2015 బాసెల్‌ ఓపెన్లో ఫెదరర్‌.. నాదల్‌ను ఓడించాడు.