సైనాతో స్నేహం: సింధు ఏం చెప్పిందంటే?

హైదరాబాదీ టాప్ షట్లర్లు పీవీ సింధు, సైనా నెహ్వాల్‌ చక్కటి స్నేహితులని భావిస్తున్నారా..? వీరిద్దరూ ఒకే నగరంలో ఉండటంతోపాటు.. గోపిచంద్ దగ్గరే శిక్షణ పొందుతున్నారనే సంగతి తెలిసిందే. దీంతో ఇద్దరి మధ్య స్నేహబంధం బలంగా ఉంటుందని చాలా భావిస్తారు. కానీ మేం కేవలం హాయ్, బై ఫ్రెండ్స్ మాత్రమే అని టాప్ షట్లర్ పీవీ సింధు హిందుస్థాన్ టైమ్స్‌కి ఇచ్చిన ఇంటర్వ్యూలో తెలిపింది. ఇద్దరి మధ్య అనుబంధం గురించి ప్రశ్నించగా.. కలిసి కూర్చొని మాట్లాడుకునేంత టైం ఉండదని సింధు బదులిచ్చింది.

సైనాకు, తనకు మధ్య పోటీ ఎప్పటికీ ఉంటుందని చెప్పిన సింధు.. అదేమీ పెద్ద విషయం కాదని తెలిపింది. ఆట ఆడేటప్పుడు ఇద్దరం గెలవాలనే తపనతోనే ఆడతాం. మా ఇద్దరి మధ్య ఉన్న పోటీ ఆట వరకు మాత్రమే అని సింధు స్పష్టం చేసింది.


ఇద్దరం ఒకే దగ్గర శిక్షణ పొందుతున్నప్పటికీ.. కలిసి మాట్లాడుకోవడానికి ఎక్కువ సమయం దొరకదని సింధు తెలిపింది. 2017లో సింధుపై నెగ్గిన సైనా నెహ్వాల్ నేషనల్ ఛాంపియన్‌‌గా నిలిచి ఫామ్‌ను అందుకుంది. కాగా, సింధు ఇండియన్ ఓపెన్ సిరీస్‌ను గెలుపొందింది.