కొరియా ఓపెన్‌లో క్వార్టర్స్ చేరిన సైనా

కొరియా ఓపెన్‌ బీడబ్ల్యూఎఫ్‌ ప్రపంచ టూర్‌ 500 బ్యాడ్మింటన్‌ టోర్నీలో భారత స్టార్ షట్లర్ సైనా నెహ్వాల్ వరుస విజయాలతో దూసుకెళ్తోంది. దక్షిణ కొరియా షట్లర్ కిమ్‌‌తో గురువారం జరిగిన ప్రీక్వార్టర్స్‌లో అద్వితీయ ప్రదర్శన కనబర్చిన సైనా నెహ్వాల్ వరుస సెట్లలో గెలుపొంది క్వార్టర్‌ఫైనల్స్‌లోకి ప్రవేశించింది. కేవలం 37 నిమిషాల వ్యవధిలో ముగిసిన ఈ మ్యాచ్‌లో సైనా నెహ్వాల్ 21-18, 21-18 తేడాతో విజయాన్ని అందుకుంది. క్వార్టర్స్‌లో జపానీస్ షట్లర్ ఒకుహరతో సైనా నెహ్వాల్ ఢీకొట్టనుంది. ఒకుహరతో చివరిగా ఆడిన రెండు మ్యాచ్‌ల్లోనూ సైనా నెహ్వాల్ ఓడిపోయింది. ఈ నేపథ్యంలో.. క్వార్టర్స్‌లో ప్రతీకారం తీర్చుకోవాలని ఈ భారత షట్లర్ ఉవ్విళ్లూరుతోంది.

ఈరోజు ప్రీక్వార్టర్స్ మ్యాచ్‌ ఆరంభంలోనే 10-2తో సైనా నెహ్వాల్ ఆధిక్యంలోకి దూసుకెళ్లగా.. మధ్యలో అనూహ్యంగా పుంజుకున్న కిమ్ 11-8కి ఆధిక్యాన్ని తగ్గించింది. కానీ.. పట్టు వదలకుండా పోరాడిన సైనా నెహ్వాల్ మళ్లీ 16-10తో ఆధిక్యాన్ని పెంచుకున్నా.. కొద్దిసేపటికే 18-18తో కిమ్‌ పాయింట్లను సమం చేసింది. దీంతో.. తొలి సెట్‌పై ఉత్కంఠ నెలకొన్నా.. భారత షట్లర్‌ ప్రత్యర్థికి అవకాశం ఇవ్వకుండా మొదటి సెట్‌ని 21-18తో ముగించింది.

రెండో సెట్‌లో సైనా నెహ్వాల్‌కి ఊహించని ప్రతిఘటన ఎదురైంది. ఆరంభంలోనే 8-1తో కిమ్‌ ఆధిక్యాన్ని అందుకుంది. కానీ.. ఒత్తిడిలో ఆడటాన్ని బాగా అలవాటు చేసుకున్న సైనా నెహ్వాల్ కొద్దిసేపటికే కిమ్ ఆధిక్యాన్ని 10-13కి తగ్గించి.. ఆ తర్వాత ఒక్కసారిగా 17-13తో దూసుకెళ్లింది. దీంతో.. ఒత్తిడికి గురైన కిమ్‌ ఆఖర్లో పుంజుకోలేకపోయింది.