Singapore Open 2022లో క్వార్టర్స్ చేరిన సైనా, సింధు, ప్రణయ్

సింగపూర్ ఓపెన్ వరల్డ్ టూర్ సూపర్ 500 టోర్నీలో భారత షట్లర్ల జోరు రెండో రోజు కూడా కొనసాగింది. మహిళల సింగిల్స్‌ ప్రీక్వార్టర్స్‌లో వేర్వేరు ప్రత్యర్థులతో గురువారం తలపడిన పీవీ సింధు, సైనా నెహ్వాల్.. గొప్ప పోరాట పటిమని కనబర్చి క్వార్టర్స్‌లో అడుగుపెట్టారు. అలానే ఫురుషుల సింగిల్స్‌లో హెచ్ ఎస్ ప్రణయ్, డబుల్స్ జోడి ఎంఆర్ అర్జున్, ద్రువ్ కపిల కూడా క్వార్టర్స్‌ చేరింది.

మూడో సీడ్ పీవీ సింధు ఈరోజు వరల్డ్ నెం.59 తు లిన్ నువైన్‌తో తలపడి 19-21, 21-19, 21-18 తేడాతో విజయాన్ని అందుకుంది. మూడు సెట్లలోనూ పీవీ సింధుకి ఆరంభం నుంచి గట్టి పోటీ ఎదురైంది. అయితే.. పట్టు వదలని సింధు.. ఆఖరి వరకూ పోరాడి మ్యాచ్‌ని చేజిక్కించుకుంది. అలానే వరల్డ్ నెం.19 హెచ్‌ఎస్ ప్రణయ్ ఈరోజు చైనీస్ తైపీ చౌ టైన్ చెన్‌పై 14-21, 22-20, 21-18 తేడాతో విజయాన్ని అందుకున్నాడు. ఈ ఇద్దరి మధ్య పోరు ఏకంగా 69 నిమిషాల పాటు జరిగింది.

ఆఖరిగా సైనా నెహ్వాల్ చాలా రోజుల తర్వాత మెరుగైన ఆటతీరుని కనబర్చింది. గత కొంతకాలంగా గాయాలతో ఇబ్బంది పడుతున్న సైనా.. ఈ ఏడాది ఏప్రిల్‌లో కామన్వెల్త్ గేమ్స్ ట్రయల్స్‌కి కూడా దూరంగా ఉంది. కానీ.. ఈరోజు ప్రీక్వార్టర్‌లో ఆమె చైనీస్ వరల్డ్ నెం.9 హి బింగ్ జియావోపై 21-19, 11-21, 21-17 తేడాతో విజయాన్ని అందుకుంది.