సింధు సేఫ్.. సైనా, శ్రీకాంత్‌కి బెస్ట్ ర్యాంక్స్

ప్రపంచ బ్యాడ్మింటన్ ఛాంపియన్‌షిప్‌లో సత్తాచాటిన భారత బ్యాడ్మింటన్ స్టార్స్ కెరీర్‌లో మళ్లీ పుంజుకున్నారు. ఈ టోర్నీ ఫైనల్లో అసాధారణంగా పోరాడి.. చివరికి రజతంతో సరిపెట్టుకున్న పి.వి.సింధు తన నాలుగో ర్యాంక్‌ని నిలబెట్టుకుంది. మరోవైపు గాయం కారణంగా గత కొంతకాలంగా పేలవ ప్రదర్శనతో నిరాశపరిచిన సైనా నెహ్వాల్ ఈ టోర్నీలో కాంస్యం గెలుచుకుని ర్యాంక్స్‌లో పైకి ఎగబాకింది. టోర్నీకి ముందు 16వ ర్యాంక్‌లో ఉన్న సైనా.. నాలుగు స్థానాలు మెరుగుపర్చుకుని ప్రస్తుతం 12వ స్థానానికి చేరుకుంది.

ఇండోనేషియా ఓపెన్, ఆస్ట్రేలియా ఓపెన్‌తో ఇటీవల సూపర్ ఫామ్ కనబర్చిన కిదాంబి శ్రీకాంత్.. ఛాంపియన్‌షిప్‌లో మాత్రం నిరాశపరిచాడు. ఈ టోర్నీలో అతను క్వార్టర్‌ ఫైనల్ దశలోనే ఓటమి చవిచూశాడు. అయినప్పటికీ.. రెండు స్థానాలు మెరుగుపర్చుకుని ఎనిమిదో ర్యాంక్‌కి చేరుకున్నాడు. అజయ్ జయరాం 16వ ర్యాంక్‌కి చేరుకోగా.. బ్యాడ్మింటన్ సంచలనం సాయి ప్రణీత్ 17వ ర్యాంక్‌తో సరిపెట్టుకున్నాడు.