ఈరోజు నుంచే బ్యాడ్మింటన్ ఛాంపియన్‌షిప్‌

ప్రతిష్ఠాత్మక ప్రపంచ బ్యాడ్మింటన్ ఛాంపియన్‌షిప్‌ ఈరోజు నుంచే మొదలవనుంది. చైనాలోని నాన్‌జింగ్ వేదికగా ప్రారంభంకానున్న ఈ టోర్నీలో భారత్‌ నుంచి స్టార్ షట్లర్లు పీవీ సింధు, సైనా నెహ్వాల్, కిదాంబి శ్రీకాంత్ తదితరులు పోటీపడనున్నారు. బ్యాడ్మింటన్‌లోనే అత్యున్నత టోర్నీగా గుర్తింపు పొందిన ఈ టోర్నీలో భారత్‌కి ఇప్పటి వరకు ఒక్క స్వర్ణం కూడా లభించలేదు.

1983‌లో జరిగిన ప్రపంచ బ్యాడ్మింటన్ ఛాంపియన్‌షిప్‌‌లో దిగ్గజ షట్లర్ ప్రకాశ్ పదుకొణె కాంస్య పతకంతో భారత్‌ని మురిపించారు. అనంతరం సుదీర్ఘకాలం తర్వాత మళ్లీ పీవీ సింధు, సైనా నెహ్వాల్ ఈ టోర్నీలో మెరిశారు. 2013, 2014లో వరుసగా రెండు సార్లు టోర్నీలో సత్తాచాటిని సింధు.. ఆఖరికి కాంస్యంతోనే సరిపెట్టగా.. 2017లో మాత్రం రజతాన్ని కైవసం చేసుకుంది. మరో షట్లర్ సైనా నెహ్వాల్ 2015లో రజతం, 2017లో కాంస్యంతో మెరిసింది. భారత్ తరఫున ఈ టోర్నీలో ఇప్పటి వరకు ఇవే మెరుగైన ప్రదర్శనలు. ఈ నేపథ్యంలో.. కనీసం ఈసారైనా స్టార్ షట్లర్లు భారత్‌కి స్వర్ణం అందిస్తారేమో.. చూడాలి..!