కిదాంబి శ్రీకాంత్‌‌కు డిప్యూటీ కలెక్టర్‌ హోదా

భారత షట్లర్‌, తెలుగుతేజం కిదాంబి శ్రీకాంత్‌కు ఏపీ ప్రభుత్వం సమున్నత హోదా కల్పించింది. అతడికి డిప్యూటీ కలెక్టర్‌ హోదా కల్పిస్తూ ఆంధ్రప్రదేశ్ అసెంబ్లీ శనివారం (డిసెంబర్ 2) బిల్లుకు ఆమోదం తెలిపింది. ఒలింపిక్‌ పతక విజేత పీవీ సింధుకు కూడా ఏపీ ప్రభుత్వం డిప్యూటీ కలెక్టర్‌ హోదా కల్పించిన సంగతి తెలిసిందే. కిదాంబి శ్రీకాంత్‌ స్వస్థలం గుంటూరు. శ్రీకాంత్‌ ఈ ఏడాది తన కెరీర్‌లోనే అత్యుత్తమంగా ప్రపంచ పురుషుల సింగిల్స్‌లో ర్యాంకింగ్స్‌లో రెండో స్థానానికి ఎగబాకి సత్తా చాటాడు. డిసెంబరు 13 నుంచి 17 వరకు దుబాయ్‌లో జరగనున్న బీడబ్ల్యూఎఫ్‌ ప్రపంచ సూపర్‌ సిరీస్‌ ఫైనల్స్‌కు అర్హత సాధించాడు.

శ్రీకాంత్‌ ఈ ఏడాది 4 సూపర్‌ సిరీస్‌ టైటిల్స్‌ను కైవసం చేసుకున్నాడు. జూన్‌లో ఇండోనేషియా ఓపెన్‌, ఆస్ట్రేలియన్‌ ఓపెన్‌ నెగ్గిన శ్రీకాంత్‌ అక్టోబరులో డెన్మార్క్‌ ఓపెన్‌, ఆ తర్వాత ఫ్రెంచ్‌ ఓపెన్‌ సూపర్‌ సిరీస్‌ నెగ్గి ఒకే ఏడాది నాలుగు సూపర్‌ సిరీస్‌ టైటిళ్లు గెలిచిన తొలి భారతీయుడిగా రికార్డు సృష్టించాడు. అసాధారణ ప్రతిభతో దూసుకెళుతున్న శ్రీకాంత్‌‌కు ఏపీ ప్రభుత్వం డిప్యూటీ కలెక్టర్‌ హోదాతో గౌరవించింది.