సుల్తాన్ అజ్లాన్ షా కప్ హాకీ: భారత్‌కు కాంస్యం

మలేసియాలో జరుగుతున్న సుల్తాన్ అజ్లాన్ షా కప్ హాకీ టోర్నమెంట్‌లో భారత్ కాంస్య పతకం సాధించింది. మూడు, నాలుగు స్థానాల కోసం శనివారం సాయంత్రం జరిగిన మ్యాచ్‌లో భారత్ 4-0 తేడాతో న్యూజిలాండ్‌పై విజయం సాధించింది. ఏకపక్షంగా సాగిన ఈ మ్యాచ్‌లో భారత ఆటగాళ్లు మొదటి నుంచి దూకుడు ప్రదర్శించారు. ఎలాంటి తప్పిదాలకు తావివ్వకుండా మ్యాచ్‌ను చేజిక్కించుకున్నారు.

తొలి 15 నిమిషాల్లో గోల్ నమోదు చేయని భారత్.. రెండో క్వార్టర్‌లో వచ్చిన పెనాల్టీ కార్నర్ అవకాశాన్ని వినియోగించుకుంది. రూపిందర్ పాల్ సింగ్.. పెనాల్టీ కార్నర్‌ను గోల్‌గా మలిచి భారత్‌ ఆధిక్యాన్ని 1-0కు పెంచాడు. ఆట 27వ నిమిషం వద్ద మళ్లీ రూపిందర్ గోల్ చేశాడు. ఆ తరవాత ఎస్వీ సునీల్, తల్విందర్ సింగ్ గోల్స్ చేశారు. దీంతో 4-0 తేడాతో కివీస్‌పై అద్భుత విజయం సాధించింది. మరోవైపు జపాన్‌ను 3-1 తేడాతో ఓడించిన మలేసియా ఐదో స్థానంలో నిలిచింది.