అసహనంతో.. బంతిని అంపైర్‌ పైకి గురిపెట్టి..

ఆటలో క్రీడాకారులకి గెలుపు బాట ఉత్తేజానికి ఊతమిస్తే.. ఓటమి భయం మాత్రం అసహనాన్ని పురిగొల్పుతుంటుంది. ఈ క్రమంలోనే సదరు ఆటగాళ్లు నోటితో, చేష్టలతో సహచరులను సైతం ఇబ్బందులకు గురిచేస్తుంటారు. తాజాగా ఓ టెన్నిస్ ఆటగాడు తన ఓటమి అసహనాన్ని ఏకంగా అంపైర్‌పై ప్రయోగించి విమర్శలతో పాటు జరిమానాను ఎదుర్కొన్నాడు. డేవిస్ కప్‌లో భాగంగా కెనడా, గ్రేట్ బ్రిటన్ మధ్య జరిగిన రసవత్తర పోరులో 2-2తో ఇరుజట్లు సమానంగా నిలిచాయి. నిర్ణయాత్మక మ్యాచ్లో కెనడా యువ ఆటగాడు షపోవలోవ్ పేలవ ప్రదర్శన కారణంగా వెనకబడటంతో కోర్టులోనే తీవ్ర అసహనానికి గురయ్యాడు. ఈ క్రమంలో లయతప్పి అతను కొట్టిన బంతి ఛైర్ అంపైర్ బ్రయన్ ఎర్లీ కంటికి బలంగా తాకింది. దీంతో అంపైర్ కాసేపు నొప్పితో విలవిలలాడిపోయాడు.

ఈ ఘటనపై షపోవలోవ్ వెంటనే క్షమాపణలు చెప్పినా... అంతర్జాతీయ టెన్నిస్ సమాఖ్య మాత్రం క్రమశిక్షణరాహిత్య చర్యలకు దిగింది. అతనిపై 7 వేల డాలర్లు జరిమానా విధిస్తూ నిర్ణయం తీసుకుంది. అయితే సమాఖ్య జరిమానా విధించక ముందే సామాజిక మాధ్యమాల ద్వారా తాను ప్రశ్చతాపం పడుతున్నట్లు షపోవలోవ్ రాసుకొచ్చాడు. అంపైర్ని గాయపర్చి క్షమించరాని తప్పిదం చేశాను. దీనికి పూర్తి బాధ్యత నేనే వహిస్తాను అంటూ విచారం వ్యక్తం చేస్తూ అంపైర్ను ట్విటర్ ద్వారా క్షమాపణలు అడిగాడు. 2016లో జూనియర్ వింబుల్డన్ గెలుచుకుని అనూహ్యంగా వెలుగులోకి వచ్చిన షపోవలోవ్ వయసు 17 ఏళ్లే.