ఆరోసారి ప్రపంచ ఉత్తమ అథ్లెట్‌గా బోల్ట్

జమైకా స్ప్రింటర్ ఉసెన్ బోల్ట్ రికార్డు స్థాయిలో ఆరోసారి ప్రపంచ ఉత్తమ అథ్లెట్‌గా నిలిచాడు. ఈ మేరకు అథ్లెట్ ఆఫ్ ది ఇయర్ అవార్డు 2016ను బోల్ట్ అందుకున్నాడు. మహిళల విభాగంలో ఇథియోపియా అథ్లెట్ అల్మజ్ అయానా ఉత్తమ అథ్లెట్‌గా నిలిచింది. రియో ఒలింపిక్స్‌లో అయానా బంగారు పతకం సాధించడంతో పాటు 10వేల మీటర్ల పరుగులో రికార్డు నెలకొల్పింది.

తొమ్మిది సార్లు ఒలింపిక్ చాంపియన్‌గా నిలిచిన బోల్ట్ గతంలో 2008, 2009, 2011, 2012, 2013 సంవత్సరాల్లో ప్రపంచ ఉత్తమ అథ్లెట్‌గా అవార్డులు అందుకున్నాడు. ఇటీవల జరిగిన రియో ఒలింపిక్స్‌లో మూడు బంగారు పతకాలు సాధించిన ఈ జమైకా చిరుత వచ్చే ఏడాది రిటైర్ అవుతున్నాడు.