యువకుడి ప్రాణం తీసిన వెయిట్ లిఫ్టింగ్

పోలీసు ఉద్యోగం సాధించాలనేది ఆ యువకుడి కల. అందుకోసం జిమ్‌లో నిరంతరం కసరత్తులు చేసేవాడు. చక్కటి శరీరాకృతి కోసం తపించేవాడు. బరువు ఎక్కువగా ఉన్న ఆ యువకుడు ఎంతో కష్టపడి ఆరువారాల్లోనే 20 పౌండ్ల బరువు (సుమారు 9.5 కిలోలు) తగ్గాడు. పోలీసు కావాలనే లక్ష్యంతో తీవ్రంగా శ్రమించే క్రమంలో.. వెయిట్ లిఫ్టింగ్ చేస్తూ ప్రమాదవశాత్తూ ప్రాణాలు కోల్పోయాడు. అమెరికాలోని లోవాకు చెందిన 22 ఏళ్ల యువకుడైన కైల్ థామ్సన్ విషాద గాథ ఇది.

థామ్సన్.. లోవా స్టేట్ యూనివర్సిటీలో చదువుకుంటున్నాడు. బాస్కెట్ బాల్, ఫుట్‌బాల్ ఆడటాన్ని ఇష్టపడే అతడు.. వెయిట్‌లిఫ్టింగ్ పట్ల కూడా ఆసక్తి చూపేవాడు. ఈ క్రమంలో గత సోమవారం జిమ్‌లో 315 పౌండ్ల బరువును పైకెత్తాడు. కానీ బార్‌బెల్ ప్రమాదవశాత్తూ జారి మెడ మీద పడటంతో.. అతణ్ని వెంటనే హాస్పిటల్‌కు తరలించారు. కానీ బ్యాడ్ లక్.. చికిత్స పొందుతూ థామ్సన్ చనిపోయాడు. అతడెప్పుడూ నవ్వుతూ పలకరించేవాడని, ఇలా జరగడం నమ్మలేకపోతున్నామని థామ్సన్ గురించి తెలిసిన వారు తీవ్ర దిగ్భాంత్రిని వ్యక్తం చేశారు.

వెయిట్ లిఫ్టింగ్ ప్రాక్టీస్ చేస్తూ 1990 నుంచి 2007 మధ్య కాలంలో పది లక్షల మంది అమెరికన్లు హాస్పిటల్ పాలయ్యారని, అందులో కేవలం 114 మంది మాత్రమే చనిపోయారని ఓ నివేదిక తెలిపింది.