ఢిల్లీలో WWE లైవ్ పోటీలు..!

భారత్‌లో రెజ్లింగ్‌ని ఇష్టపడే అభిమానులకి తీయటి కబురు. ఈ ఏడాది డిసెంబరు‌లో ఢిల్లీ వేదికగా రెండు డబ్ల్యూడబ్ల్యూఈ లైవ్ ఈవెంట్లని నిర్వహించనున్నారు. 2016, జనవరిలో ఢిల్లీ, ముంబయి, బెంగళూరులో ఈ పోటీలను నిర్వహించారు. అప్పట్లో వాటికి అభిమానుల నుంచి మంచి ఆరణ లభించింది. దీంతో మరోసారి ఢిల్లీ వేదికగా డిసెంబరు 7, 8న ఈ ఈవెంట్లని నిర్వహించేందుకు ఏర్పాట్లు చేస్తున్నారు.

భారత సంతతికి చెందిన రెజ్లర్ జిందర్ మహల్ హెవీ వెయిట్ ఛాంపియన్‌షిప్ గెలవడంతో భారత్‌లో డబ్ల్యూడబ్ల్యూఈకి ఆదరణ మరింత పెరిగింది. గతంలో 2007లో ద గ్రేట్ ఖలీ ఈ ఛాంపియన్‌షిప్‌ని గెలిచి రికార్డు నెలకొల్పాడు. మళ్లీ ఇన్నాళ్లకి ఓ భారత సంతతి వ్యక్తి సత్తాచాటుతుండటంతో నిర్వాహకులు సైతం ఇక్కడ ఈవెంట్లని పెట్టేందుకు ఆసక్తి కనబరుస్తున్నారు. ఫైట్స్ అన్నీ స్క్రిప్ట్ ప్రకారం నడిచినా.. లైవ్‌లో స్టంట్స్‌ చూడాలనే భారతీయ రెజ్లింగ్ అభిమానుల కోరిక తీర్చేందుకే ఈ ఈవెంట్లు అని నిర్వాహకులు తెలిపారు.