లండన్ ఒలింపిక్స్‌.. రజత ‘యోగం’ లేనట్లే!

లండన్ ఒలింపిక్స్‌లో యోగేశ్వర్ దత్‌ సాధించిన కాంస్య పతకం రజతంగా అప్‌గ్రేడ్ అయ్యే అవకాశాలు లేవని ఐఓసీ స్పష్టం చేసింది. నాలుగేళ్ల క్రితం లండన్‌లో జరిగిన ఒలింపిక్స్‌లో రెజ్లర్ యోగేశ్వర్ దత్ కాంస్య పతకం సాధించిన సంగతి తెలిసిందే. ఆ ఒలింపిక్స్‌లో 60 కేజీల ఫ్రి స్టయిల్ రెజ్లింగ్ విభాగంలో సిల్వర్ మెడల్ నెగ్గిన రష్యా రెజ్లర్ బెసిక్ కుదుకోవ్ నిషేధిత ఉత్ప్రేరకాలు వాడినట్టు తేలింది. దీంతో అతడు పతకాన్ని కోల్పోవాల్సిన పరిస్థితి తలెత్తింది. ఫలితంగా యోగేశ్వర్‌దత్‌కు వెండి పతకం దక్కుతుందని భావించారు. 2013లో జరిగిన ఓ కారు యాక్సిడెంట్లో కుదుకోవ్ ప్రాణాలు కోల్పోయాడు. ఈ రష్యన్ రెజ్లర్ ఇప్పటికే మరణించిన కారణంగా అతడిపై విచారణ నిలిపేయాలని ఒలింపిక్ కమిటీ నిర్ణయించింది. ఫలితంగా యోగేశ్వర్‌ పతకం అప్‌గ్రేడ్ కాకుండా నిలిచిపోయింది.

కుదుకోవ్ మరణానికి ముందే వరల్డ్ యాంటీ డోపింగ్ ఏజెన్సీ అతడికి డోప్ టెస్ట్ నిర్వహించింది. ఒలింపిక్స్‌లో పాల్గొనడానికి ముందు కుదుకోవ్ వద్ద నుంచి సేకరించిన శాంపిళ్లను ఈ ఏడాది రష్యన్ రెజ్లింగ్ ఫెడరేషన్ పరీక్షించింది. నిషేధిత ఉత్ప్రేరకాలు వాడినట్టు ఈ టెస్టులో తేలింది. శాంపిల్స్ సేకరించిన నాటి 8 ఏళ్ల వరకు డోపింగ్ టెస్ట్ కోసం మళ్లీ పరీక్షలు నిర్వహించే వీలుండగా, 2015లో అంతర్జాతీయ ఒలింపిక్ సంఘం ఆ గడువును మరో రెండేళ్లు పొడిగించింది. గతంలో యోగశ్వర్‌ సాధించిన పతకం అప్‌గ్రేడ్ అవుతుందని సూచనప్రాయంగా వార్తలు వెలువడ్డాయి.

తనకు ఆ వెండి పతకం అక్కర్లేదని, కుదుకోవ్ తల్లిదండ్రుల దగ్గర్నుంచి అతడి జ్ఞాపకాలను లాగేసుకోనని.. యోగేశ్వర్ ఇప్పటికే స్పష్టం చేశాడు. రియోలో తొలి రౌండ్లోనే వెనుదిరిగి నిరాశ పర్చిన యోగేశ్వర్ దత్.. ప్రస్తుతం అకాడమీ ఏర్పాట్లకు సంబంధించిన పనుల్లో బిజీగా ఉన్నాడు.