డేటింగ్ రూమర్స్ : స్పందించిన రవిశాస్త్రి, నటి

టీమిండియా ప్రధాన కోచ్‌ రవిశాస్త్రి, బాలీవుడ్‌ నటి నిమ్రత్‌ కౌర్‌లు గత కొంతకాలం నుంచి రహస్యంగా డేటింగ్‌ చేస్తున్నారని వార్తలు హల్‌చల్‌ చేశాయి. త్వరలో వీరిద్దరూ వివాహ బంధంతో ఒక్కటి కానున్నారని వదంతులు ప్రచారంలో ఉన్నాయి. అయితే తమపై వచ్చిన కథనాలు కేవలం వదంతులు మాత్రమేనని, అందులో ఇసుమంతైనా నిజం లేదని రవిశాస్త్రి, నిమ్రత్ స్పష్టం చేశారు. 1986లో బాలీవుడ్ నటి అమృతా సింగ్, రవిశాస్త్రిలు ప్రేమించుకోవడంతో వీరి వ్యవహారం దాదాపు పెళ్లిపీటల వరకు వెళ్లిన సంగతి తెలిసిందే.

తనపై వచ్చిన కథనాలు పేడతో సమానమన్నారు రవిశాస్త్రి. ప్రస్తుతం తాను ఒంటరిగానే ఉన్నానని, తోడుకావాలని ప్రేమకోసం తాను వెంపర్లాడటం లేదని తెలిపారు. ఓవైపు ఇంగ్లాండ్ చేతిలో భారత జట్టు దారుణ వైఫల్యాలు ఎదుర్కొంటుంటే.. మరోవైపు కోచ్ రవిశాస్త్రి తన ప్రేయసి నిమ్రత్‌ ప్రేమలో మునిగి తేలుతున్నారన్న విమర్శలు వెల్లువెత్తుతున్నాయి.

2015లో ప్రముఖ కార్ల కంపెనీ ‘ఆడి’ ప్రచార కార్యక్రమంలో రవిశాస్త్రి, నిమ్రత్‌లు తొలిసారి కలుసుకున్నారు. ఆ కార్ల కంపెనీకి ప్రచారకర్తలుగా వ్యవహరించిన వీరి పరిచయం ప్రేమగా మారిందన్న వదంతులను మోడల్ నిమ్రత్‌ ట్విట్టర్‌లో కొట్టి పారేశారు. ‘నాకు రూట్ కెనాల్ అవసరమన్నది వాస్తవం. నా గురించి వచ్చిన వార్తలు కేవలం కట్టుకథలు. ఆ వదంతులు మానసికంగా గాయపరిచాయి. డేటింగ్ కథనాలన్నీ ట్రాష్‌. మంచి రోజులు ముందున్నాయి’ అని నిమ్రత్ ట్వీట్ చేశారు.