విలియమ్సన్, ధావన్ హిట్.. దిల్లీ టార్గెట్ 192

ఐపీఎల్ పదో సీజన్‌లో సన్‌రైజర్స్ హైదరాబాద్ బ్యాట్స్‌మెన్లు సొంతగడ్డపై మరోసారి రెచ్చిపోయారు. దిల్లీ డేర్‌డెవిల్స్‌తో ఉప్పల్ వేదికగా జరుగుతున్న మ్యాచ్‌లో కేన్ విలియమ్సన్ (89: 51 బంతుల్లో 6x4, 5x6), శిఖర్ ధావన్ (70: 50 బంతుల్లో 7x4, 1x6 ) అర్ధశతకాలు బాదడంతో తొలుత బ్యాటింగ్ చేసిన హైదరాబాద్ 4 వికెట్ల నష్టానికి 191 పరుగులు చేసింది. ఫామ్‌లో ఉన్న కెప్టెన్ డేవిడ్ వార్నర్ (4) ఇన్నింగ్స్ రెండో ఓవర్‌లోనే క్రిస్ మోరీస్ బౌలింగ్‌లో షాట్‌కి ప్రయత్నించి ఫీల్డర్ అమిత్ మిశ్రా చేతికి చిక్కాడు. దీంతో హైదరాబాద్ ఒత్తిడిలో పడినట్లు కనిపించింది. కానీ సీజన్‌‌లో తొలి మ్యాచ్ ఆడిన కేన్ విలియమ్సన్ ఓపెనర్ ధావన్‌తో కలిసి ఇన్నింగ్స్ నిలబెట్టాడు.

తన సహజశైలికి భిన్నంగా ఆది నుంచే భారీ షాట్లు ఆడుతూ వచ్చిన విలియమ్సన్ 33 బంతుల్లోనే అర్ధశతకం పూర్తి చేసుకున్నాడు. మరో ఎండ్‌లో నిలకడగా ఆడిన ధావన్ కూడా 40 బంతుల్లో 50 పరుగులు చేయడంతో హైదరాబాద్ 16 ఓవర్లు ముగిసే సమయానికి 148/1తో భారీ స్కోరుకి బాటలు వేసుకుంది. కానీ ఇన్నింగ్స్ 17వ ఓవర్ వేసిన క్రిస్ మోరీస్ మరోసారి సన్‌రైజర్స్‌ని దెబ్బతీశాడు. శతకం వైపు దూసుకెళ్తున్న విలియమ్సన్‌ని బుట్టలో వేసేశాడు. దీంతో 136 పరుగుల రెండో వికెట్ భాగస్వామ్యానికి తెరపడింది. అయితే విలియమ్సన్ ఔట్ అనంతరం ధావన్ బ్యాట్ ఝళిపించినా.. అతనితో పాటు యువరాజ్ సింగ్ (3)ని వరుస బంతుల్లో క్రిస్ మోరీస్ 19 ఓవర్‌లో పెవిలియన్‌కి పంపాడు. కానీ.. చివరి ఓవర్‌లో హెన్రిక్యూస్ (12), దీపక్ హుడా (9) ధాటిగా ఆడి 17 పరుగులు రాబట్టడంతో సన్‌రైజర్స్ 191 పరుగులు చేయగలిగింది. హైదరాబాద్ కోల్పోయిన నాలుగు వికెట్లను మోరీస్ తీయడం విశేషం.