తడబడిన హైదరాబాద్.. కోల్‌కతా టార్గెట్ 129

ఐపీఎల్ పదో సీజన్‌ ఎలిమినేటర్ మ్యాచ్‌లో సన్‌రైజర్స్ హైదరాబాద్ బ్యాట్స్‌మెన్ తడబడ్డారు. బెంగళూరు వేదికగా కోల్‌కతా నైట్‌రైడర్స్‌తో జరుగుతున్న మ్యాచ్‌లో కెప్టెన్ డేవిడ్ వార్నర్ (37: 35 బంతుల్లో 2x4, 2x6), విజయ్ శంకర్ (22: 17 బంతుల్లో 2x4, 1x6) ఫర్వాలేదనిపించడంతో తొలుత బ్యాటింగ్ చేసిన హైదరాబాద్ 7 వికెట్ల నష్టానికి 128 పరుగులు చేసింది. టాస్ గెలిచిన కోల్‌కతా కెప్టెన్ గౌతమ్ గంభీర్ హైదరాబాద్‌ని బ్యాటింగ్‌కు ఆహ్వానించాడు. అతి జాగ్రత్తగా ఆడిన ఓపెనర్ శిఖర్ ధావన్ (11) ఐదో ఓవర్‌లో పెవిలియన్ చేరిపోగా.. అనంతరం వచ్చిన విలియమ్సన్ (24: 26 బంతుల్లో 2x4, 2x1)తో కలిసి కెప్టెన్ వార్నర్ ఇన్నింగ్స్ నడిపించాడు. అయితే వీరిద్దరూ మరీ నెమ్మదిగా బ్యాటింగ్ చేయడంతో హైదరాబాద్ 11.5 ఓవర్లు ముగిసే సమయానికి 75/1తో నిలిచింది.

ఈ దశలో నిలకడగా ఆడుతున్న విలియమ్సన్‌ని కౌల్టర్ నైల్ ఔట్ చేయగా.. మూడు బంతుల వ్యవధిలోనే స్పిన్నర్ పీయూష్ చావ్లా బంతిని అంచనా వేయడంలో తడబడిన వార్నర్ క్లీన్ బౌల్డయ్యాడు. అనంతరం వచ్చిన యువరాజ్ (9) ఎక్కువ సేపు నిలవలేకపోయినా.. విజయ్ శంకర్ భారీ షాట్లు ఆడుతూ స్కోరు బోర్డును నడిపించాడు. అయితే ఇన్నింగ్స్ 19వ ఓవర్ వేసిన కౌల్టర్ నైల్ ఒక బంతి వ్యవధిలోనే శంకర్, క్రిస్ జోర్దాన్ (0)ని బోల్తా కొట్టించాడు. చివర్లో నమన్ ఓజా (16 నాటౌట్: 16 బంతుల్లో 1x6) ఆశించిన మేర హిట్టింగ్ చేయలేకపోవడంతో హైదరాబాద్ 128 పరుగులకే పరిమితమైంది. కోల్‌కతా బౌలర్లలో కైల్టర్ నైల్ మూడు వికెట్లు తీయగా.. ఉమేశ్ యాదవ్ రెండు, పీయూష్ చావ్లా, ట్రెంట్ బౌల్ట్ చెరో వికెట్ తీశారు.