H-1B వీసా: అమెరికాలో టీసీఎస్ రిక్రూట్‌మెంట్

భారత్‌కి చెందిన టెక్నాలజీ దిగ్గజం టాటా కన్సల్టెన్సీ సర్వీసెస్ (టీసీఎస్) అమెరికాలో రిక్రూట్‌మెంట్స్ పెంచనున్నట్టు స్పష్టంచేసింది. తమ సంస్థ పురోగతికి దోహదపడుతున్న ఈ విదేశీ మార్కెట్(అమెరికా)లో పెట్టుబడులపై కోత విధించే ఆలోచనే లేదని టీసీఎస్ ఓ ప్రకటనలో పేర్కొంది. గత నాలుగైదేళ్లలో మేము అమెరికాలో అధిక సంఖ్యలో రిక్రూట్‌మెంట్స్ చేపట్టినట్టు ఆసియా-పసిఫిక్ రీజియన్ హెడ్ గిరీష్ రామచంద్రన్ ప్రముఖ వార్తా సంస్థ రాయిటర్స్‌కి ఇచ్చిన ఓ ఇంటర్వ్యూలో తెలిపారు. ఐటీ సర్వీసెస్ అత్యధికంగా వినియోగించే అమెరికాలో తమ బిజినెస్‌కి మంచి ఆదరణ వుందంటున్న రామచంద్రన్.. సంస్థ ఆదాయంలో సగం వాటా అమెరికా నుంచే వస్తోందని స్పష్టంచేశారు.

సాధారణంగా అమెరికాలో ఐటీ సేవలు అందించే వివిధ విదేశీ సంస్థలు ఇక్కడి సిబ్బందిని H-1B వీసాలపై అమెరికాకి పంపిస్తుంటాయి. కానీ అమెరికా ప్రస్తుత అధ్యక్షుడు డొనాల్ట్ ట్రంప్ పాలన చేపట్టిన తర్వాత ఇమ్మిగ్రేషన్ విధానాల్లో సంస్కరణలు రావడంతో H-1B వీసాల జారీ కష్టతరంగా మారింది. దీంతో మున్ముందు ఎదురవబోయే సవాళ్లని అధిగమించడానికి సంస్థలు అక్కడి వారినే తమ సంస్థల్లో నియమించుకుంటున్నాయని తెలుస్తోంది.