జగన్ రెడ్డి నీ పాలనకు ఇవే నిదర్శనం.. ప్రజలకు సమాధానం చెప్పాల్సిందే: చంద్రబాబు

YSRCP ప్రభుత్వ వైఫల్యాలపై టీడీపీ అధినేత చంద్రబాబు (TDP Chief Chandrababu) తీవ్రస్థాయిలో ధ్వజమెత్తారు. రాష్ట్ర ఆదాయం గాడిన పడిందన్న సీఎం జగన్ (YS Jaganmohan Reddy) వ్యాఖ్యలపై ఆయన మండిపడ్డారు. 'రాష్ట్రంలో పాలనా దుస్థితికి ఈ ఘటనలే ఉదాహరణలు' అంటూ ట్విట్టర్ (Twitter) వేదికగా పలు ఘటనలను ఆయన ప్రస్తావించారు.

కాకినాడ జిల్లా జె.తిమ్మాపురంలో ఆసుపత్రికి వెళుతున్న పసిబిడ్డ గతుకుల రోడ్డులో ప్రాణాలు కోల్పోయిన ఘటనను చంద్రబాబు గుర్తు చేశారు. సకాలంలో బిల్లులు చెల్లించకపోవటంతో క్యాన్సర్ బాధితుడైన తండ్రి వైద్యానికి డబ్బులు లేక ఇబ్బందులు ఎదుర్కొంటున్న ప్రభుత్వ కాంట్రాక్టర్ వెంకట శివప్ప ఘటనను ట్వీట్ (CBN Tweet) చేశారు. ఏపీ ఆదాయం గాడిన పడిందన్న సీఎం సమీక్ష వార్తను, వారం రోజులు గడుస్తున్నా.. పదవీ విరమణ చేసిన ఉద్యోగులకు పెన్షన్ అందని అంశాన్ని పోలుస్తూ చంద్రబాబు ట్వీట్ చేశారు. రాష్ట్ర ఆదాయం బాగుంటే ప్రభుత్వ వైఫల్యాలు సామాన్యుడి జీవితాలను ఎందుకు చిధ్రం చేస్తున్నాయని చంద్రబాబు జగన్ సర్కారును ప్రశ్నించారు. ప్రజలను బాధిస్తున్న పన్నులు ఎటుపోతున్నాయని.., లక్షల కోట్ల అప్పులు ఏమవుతున్నాయని నిలదీశారు.

"రాష్ట్రంలో పాలనా దుస్థితికి ఈ ఘటనలే ఉదాహరణలు. ప్రభుత్వ వైఫల్యాలు సామాన్యుడి జీవితాలను ఎలా చిధ్రం చేస్తున్నాయో చెప్పడానికి ఇవి నిదర్శనం. ప్రజలను బాదేస్తున్న పన్నులు ఎటుపోతున్నాయి... లక్షల కోట్ల అప్పులు ఏమవుతున్నాయి ? ప్రభుత్వం ప్రజలకు సమాధానం చెప్పాల్సిందే !" - చంద్రబాబు