చౌకైన జియో 4G స్మార్ట్‌ఫోన్‌ JioPhone Next కొనడం ఇక మరింత సులభం - ఆఫ్‌లైన్ స్టోర్లలోనూ..

చౌకైన 4జీ స్మార్ట్‌ఫోన్‌గా జియోఫోన్ నెక్ట్స్ (JioPhone Next)ను తీసుకొచ్చింది రిలయన్స్ జియో (Reliance Jio). తక్కువ ధరలోనే మంచి స్పెసిఫికేషన్లతో ఈ ఫోన్‌ను గత సంవత్సరం నవంబర్ 4న దీపావళి సందర్భంగా లాంచ్ చేసింది. టెక్ దిగ్గజం గూగుల్ (Google) భాగస్వామ్యంతో ముకేశ్ అంబానీకి చెందిన జియో.. JioPhone Nextను తీసుకొచ్చింది. అయితే ఇంత కాలం ఈ మొబైల్‌ను కొనాలంటే ఆన్‌లైన్‌ ద్వారానే సాధ్యమయ్యేది. లేకపోతే ముందుగా జియో వెబ్‌సైట్‌‌లో రిజిస్టర్ చేసుకొని.. ఆ తర్వాత జియో స్టోర్‌కు వెళ్లి తీసుకోవాల్సి వచ్చేది. అయితే ఇప్పుడు ఈ ప్రాసెస్ ఏదీ లేకుండా JioPhone Nextను కొనుగోలు చేయవచ్చు. అదెలా అంటే..

జియోఫోన్ నెక్ట్స్ ఎలా కొనుగోలు చేయవచ్చంటే..
ప్రస్తుతం ఎలాంటి రిజిస్ట్రేషన్ అవసరం లేకుండా ఆఫ్‌లైన్‌లోనే జియోఫోన్ నెక్ట్స్‌ను కొనుగోలు చేసే అవకాశం వచ్చింది. నేరుగా మీ దగ్గర్లోని జియో స్టోర్‌కు వెళ్లి ఈ మొబైల్‌ను కొనొచ్చు.రూ.6,499 చెల్లించి JioPhone Nextను సొంతం చేసుకోవచ్చు.
ముందుగా డౌన్‌పేమెంట్ రూ.1,999 చెల్లించి.. ఈఎంఐ విధానంలోనూ ఈ మొబైల్‌ కొనుగోలు చేసే అవకాశం ఉంటుంది. అయితే ఇందుకోసం ప్రాసెసింగ్ ఫీజ్‌గా అదనంగా రూ.501 చెల్లించాల్సి ఉంటుంది.

JioPhone Next స్పెసిఫికేషన్లు, ఫీచర్లు
జియోఫోన్ నెక్ట్స్ మొబైల్‌ 5.45 ఇంచుల హెచ్‌డీ+ డిస్‌ప్లే, కార్నింగ్ గొరిల్లా గ్లాస్ 3 ప్రొటెక్షన్ కలిగి ఉంది. క్వాల్‌కామ్‌ స్నాప్‌డ్రాగన్ క్యూఎం215 క్వాడ్‌కోర్ ప్రాసెసర్‌పై ఈ ఫోన్‌ నడుస్తుంది. 2జీబీ ర్యామ్, 32జీబీ ఇంటర్నల్ స్టోరేజ్‌తో ఈ ఫోన్‌ వస్తుంది. మైక్రోఎస్‌డీ కార్డు స్లాట్ కూడా ఉంటుంది.

జియో‌ఫోన్ నెక్ట్స్ (JioPhone Next) మొబైల్ ప్రగతి ఓఎస్‌ (Pragati OS)పై నడుస్తుంది. గూగుల్‌తో కలిసి జియో ఈ ఆపరేటింగ్ సిస్టమ్‌ను రూపొందించింది జియో. అందుకే గూగుల్ ప్రీలెడెడ్ యాప్స్ ఎక్కువగా ఉంటాయి. ఇక JioPhone Next వెనుక 13 మెగాపిక్సెల్ కెమెరా ఉంటుంది. వీడియోకాల్స్, సెల్ఫీల కోసం 8 మెగాపిక్సెల్ ఫ్రంట్ కెమెరా ఉంది.

డ్యుయల్ సిమ్ సపోర్టుతో జియోఫోన్ నెక్ట్స్ వస్తోంది. అయితే ఒక స్లాట్ జియో సిమ్ కోసం మాత్రమే లాక్ అయి ఉంటుంది. ఆ జియో సిమ్‌ ద్వారానే డేటా వాడుకునే సదుపాయం ఉంటుంది. మరో స్లాట్‌లో వేరే సిమ్ వాడినా.. కేవలం కాల్స్‌, ఎస్ఎంఎస్‌లకే పరిమితం కావాల్సి ఉంటుంది. ఇక 4జీ ఎల్‌టీఈ, వైఫై, బ్లూటూత్, 3.5ఎంఎం హెడ్‌ఫోన్ జాక్, ఓటీజీ సపోర్ట్, మైక్రో యూఎస్‌బీ లాంటి కనెక్టివిటీ ఆప్షన్లు ఉంటాయి. JioPhone Nextలో 3500ఎంఏహెచ్ బ్యాటరీ ఉంటుంది.