Airtel New Plans: జియోకు దీటుగా ఎయిర్‌టెల్‌ నుంచి కొత్త ప్రీపెయిడ్ ప్లాన్స్

ప్రముఖ టెలికాం దిగ్గజం ఎయిర్‌టెల్ తన ప్రీపెయిడ్ వినియోగదారుల కోసం రూ.419తో సరికొత్త ప్లాన్‌ను తాజాగా అందుబాటులోకి తెచ్చింది. జియో రూ.349 ప్లాన్‌కు దీటుగా ఈ కొత్త ప్లాన్‌ను తీసుకొచ్చింది. జియో తన రూ.349 ప్లానులో భాగంగా రోజుకు 1.5 జీబీ డేటా, లోకల్, ఎస్టీడీ అపరిమిత వాయిస్ కాల్స్, 100 ఎస్ఎంఎస్‌లను 70 రోజుల కాలపరిమితితో అందిస్తోంది.

కాగా.. ఎయిర్‌టెల్ రూ.419 ప్లాన్ ద్వారా 75 రోజుల కాలపరిమితితో రోజుకు 1.4 జీబీ డేటా, 100 ఎస్‌ఎంఎస్‌లు, నేషనల్ రోమింగ్‌పై ఉచిత కాల్స్, ప్రతిరోజు లోకల్, ఎస్టీడీ కాల్స్ పై 300 నిమిషాలు, వారానికి వెయ్యి నిమిషాలు లభిస్తాయి. అలాగే ఎయిర్ టెల్ టీవీ యాప్‌ను కూడా అందిస్తోంది. వీటితోపాటు రూ.35, రూ.65, రూ.95లతో మూడు చౌక రిచార్జ్ ప్లాన్లను కూడా ఎయిర్‌టెల్ ప్రకటించింది. వీటిల్లో డేటాతోపాటు, ఫుల్ టాక్‌టైం అందిస్తోంది.

చౌక రిచార్జ్ ప్లాన్ల వివరాలు ఇలా..
* రూ.35 ప్లాన్‌లో 100 ఎంబీ డేటా, రూ.26.66 టాక్‌టైం అందిస్తోంది. ప్లాన్ కాలపరిమితి 28 రోజులు.
* రూ.65 ప్లాన్‌లో 200 ఎంబీ డేటా, ఫుల్‌ టాక్‌టైం అందిస్తోంది. ప్లాన్ కాలపరిమితి 28 రోజులు.
* రూ.95 ప్లాన్‌లో 500 ఎంబీ డేటా, ఫుల్ టాక్‌టైం అందిస్తోంది. ప్లాన్ కాలపరిమితి 28 రోజులు.