50,000mAh Power bank : ‘బాహుబలి’ పవర్ బ్యాంక్ - 50,000mAh కెపాసిటీతో.. ఫాస్ట్ చార్జింగ్ కూడా..

Ambrane Stylo Max Power Bank : సాధారణంగా 1,000mAh, 2000mAh కెపాసిటీతో కూడిన పవర్ బ్యాంక్‌లను చూస్తుంటాం. ఈ సామర్థ్యంతోనే ఎక్కువగా వస్తుంటాయి. అయితే దేశీయ బ్రాండ్ ఆంబ్రేన్ (Ambrane) ఏకంగా 50,000mAh కెపాసిటీతో కొత్తగా పవర్ బ్యాంక్‌ను లాంచ్ చేసింది. ఆంబ్రేన్ స్టైలో మ్యాక్స్ (Ambrane Stylo Max) పేరుతో ఇది మార్కెట్‌లోకి వచ్చింది. మొబైళ్లకే కాకుండా ఈ భారీ పవర్ బ్యాంక్ ద్వారా ల్యాప్‌టాప్‌లు, డిజిటల్ కెమెరాలు లాంటి డివైజ్‌లను కూడా చార్జ్ చేసుకోవచ్చు. ఓవర్ హీటింగ్, షార్ట్ సర్క్యూట్స్ జరగకుండా రక్షణగా ఏడు లైయర్ల చిప్‌సెట్ ప్రొటెక్షన్‌తో ఈ 50000mAh Ambrane Stylo Max పవర్ బ్యాంక్ వస్తోంది. ఫాస్ట్ చార్జింగ్ ఔట్‌పుట్, ఇన్‌పుట్ సపోర్ట్ కూడా ఉంది.

Ambrane Stylo Max పవర్ బ్యాంక్ ధర
ఆంబ్రేన్ స్టైలో మ్యాక్స్ పవర్ బ్యాంక్ ధర రూ.3,999గా ఉంది. ఈ-కామర్స్ సైట్ ఫ్లిప్‌కార్ట్‌ (Flipkart)లో అందుబాటులో ఉంది. అలాగే ఆంబ్రేన్ అధికారిక వెబ్‌సైట్‌లో కూడా కొనుగోలు చేయవచ్చు. బ్లాక్, బ్లూ కలర్ ఆప్షన్‌లలో ఈ పవర్ బ్యాంక్ లభిస్తోంది. దీనికి ఆరు నెలల వారెంటీని ఆంబ్రేన్ ఇస్తోంది.

Ambrane Stylo Max స్పెసిఫికేషన్లు, ఫీచర్లు
50,000mAh భారీ సామర్థ్యమున్న లిథియమ్ పారిమర్ బ్యాటరీతో ఆంబ్రేన్ స్టైలో మ్యాక్స్ పవర్ బ్యాంక్ వస్తోంది. గ్రేడియంట్ మ్యాట్ మెటాలిక్ బాడీని కలిగి ఉంది. పవర్ డెలివరీ టెక్నాలజీతో కూడిన 20వాట్ల ఫాస్ట్ చార్జింగ్ ఔట్‌పుట్ ఉంటుంది. అంటే స్మార్ట్‌ఫోన్‌లు, ల్యాప్‌టాప్‌లను వేగంగా చార్జ్ చేయగలదు. అలాగే 18వాట్ల ఫాస్ట్ చార్జింగ్‌తో ఈ పవర్ బ్యాంక్ చార్జ్ అవుతుంది. పెద్ద డివైజ్‌లైన ల్యాప్‌టాప్‌లు, డిజిటల్ కెమెరాలను కూడా ఈ పవర్ బ్యాంక్‌తో చార్జ్ చేసుకోవచ్చని ఆంబ్రేన్ పేర్కొంది. ఫాస్ట్ చార్జింగ్‌కు సపోర్ట్ చేసే ఆండ్రాయిడ్‌, ఐఫోన్‌లను 30 నిమిషాల్లో 50 శాతం వరకు ఈ పవర్ బ్యాంక్ చార్జ్ చేయగలదు.

ఈ వపర్ బ్యాంక్‌కు రెండు యూఎస్‌బీ, ఓ యూఎస్‌బీ టైప్-సీ పోర్ట్‌లు ఉన్నాయి. అంటే ఒకే సమయంలో మూడు డివైజ్‌లను చార్జ్ చేసుకోవచ్చు. యూఎస్‌బీ, టైప్-సీ పోర్ట్ ద్వారా చార్జింగ్ సదుపాయం ఉండే అన్ని డివైజ్‌లను ఈ పవర్ బ్యాంక్‌తో చార్జ్ చేసుకోవచ్చు.

ఓవర్ హీటింగ్, షార్ట్ సర్క్యూట్స్ నుంచి రక్షణగా ఉండేందుకు నైన్-లేయర్ చిప్‌సెట్ ప్రొటెక్షన్‌ను స్టైలో మ్యాక్స్ పవర్ బ్యాంక్‌లో పొందుపరిచినట్టు ఆంబ్రేన్ పేర్కొంది. టూ వే హై స్పీడ్ చార్జింగ్‌కు కూడా సపోర్ట్ చేస్తుంది. అలాగే డివైజ్‌ను బట్టి పవర్ ఔట్‌పుట్‌ను అడ్జస్ట్ చేసుకుంటుందని ఆంబ్రేన్ పేర్కొంది.