గూగుల్ ను మోసం చేయడం కూడా సాధ్యమే!
ప్రస్తుతం నగరాల్లో ఉన్న వారందరికీ గూగుల్ మ్యాప్స్ అత్యవసర యాప్ అయింది. ఎందుకంటే కేవలం దారిని చూపెట్టడం మాత్రమే కాకుండా ఎక్కడెక్కడ ట్రాఫిక్ ఎక్కువ ఉంది అనే విషయాన్ని కూడా మనం గూగుల్ మ్యాప్స్ ద్వారా తెలుసుకోవచ్చు. మనం ఎక్కడికైనా వెళ్లాలంటే ట్రాఫిక్ లేని రూట్లను కూడా గూగుల్ మ్యాప్స్ లో ఎంచుకోవచ్చు. గూగుల్ కూడా దీని విషయమై ఎన్నో ప్రకటనలను ఇస్తోంది. కానీ దీన్ని మోసం చేయడం కూడా సాధ్యమేనని ఓ వ్యక్తి చేసి చూపించాడు. బెర్లిన్ లోని ఓ వ్యక్తి కేవలం 99 స్మార్ట్ ఫోన్లను ఉపయోగించి నకిలీ ట్రాఫిక్ జామ్ ను సృష్టించాడు.
ఒకే కార్ట్ లో 99 స్మార్ట్ ఫోన్లతో!
సైమన్ వెకెర్ట్ అనే ఆర్టిస్ట్ ఈ పని చేశాడు. దీనికి సంబంధించిన వీడియోను అతను తన యూట్యూబ్ చానెల్లో పోస్ట్ చేశాడు. ఒక హ్యాండ్ కార్ట్ లో 99 స్మార్ట్ ఫోన్లను ఉంచి వెకెర్ట్ దాన్ని మెల్లగా తీసుకువెళ్తూ ట్రాఫిక్ జామ్ కలిగిందనే భ్రమను గూగుల్ కు కలిగించాడు. బెర్లిన్ లోని గూగుల్ ఆఫీస్ వద్దకు కూడా అతను ఇదే విధంగా వెళ్లడం విశేషం.
గూగుల్ మ్యాప్స్ పనిచేసేది ఇలా!
ఒక్కో రోడ్డు మీద ఎన్ని స్మార్ట్ ఫోన్లు ఉన్నాయి, అవి ఎంత వేగంతో కదులుతున్నాయనే సమాచారం ఆధారంగా ఆ ప్రాంతంలో ఎంత ట్రాఫిక్ ఉందనే విషయాన్ని గూగుల్ అంచనా వేస్తుంది. సరిగ్గా ఈ విషయంలోనే అతను గూగుల్ ను మోసం చేశాడు. ఒకే వీధిలో 99 స్మార్ట్ ఫోన్లతో ఇతను తిరుగుతూ ఉండటంతో ఈ వీధిలో ట్రాఫిక్ ఎక్కువగా ఉందని గూగుల్ అంచనా వేసింది. కానీ నిజానికి ఆ వీధి పూర్తిగా ఖాళీగా ఉంది.
Also Read: ఈ 10 విషయాలు తెలిస్తే.. Whatsappను వాడాలంటే కచ్చితంగా భయం వేస్తుంది!
గ్రీన్ నుంచి క్రమంగా మెరూన్ రంగులోకి!
స్మార్ట్ ఫోన్ల సంఖ్య ఎక్కువగా ఉండి, వాటి కదలిక ఎక్కువగా ఉంటే.. ఆ ప్రాంతంలో ట్రాఫిక్ ఎక్కువగా ఉన్నట్లు గూగుల్ గుర్తించి ఎరుపు లేదా మెరూన్ రంగుల్లో దాన్ని చూపిస్తుంది. ఇతను యూట్యూబ్ లో ఉంచిన వీడియోలో గూగుల్ మ్యాప్స్ లో ఇతను తిరుగుతున్న ప్రాంతాలు గ్రీన్ కలర్ నుంచి క్రమంగా మెరూన్ లోకి మారడం గమనించవచ్చు. అంటే ఈ రోడ్లలో ట్రాఫిక్ ఎక్కువగా ఉన్నట్లు గూగుల్ గుర్తించిందన్న మాట.
Also Read: ఈ నెలలో లాంచ్ కానున్న స్మార్ట్ ఫోన్లు ఇవే! మీరు కొనే కొత్త ఫోన్ వీటిలోదే కావచ్చు!
ఫేక్ అయ్యే అవకాశమూ లేకపోలేదు!
దీనికి సంబంధించిన పూర్తి వివరాలను వెకెర్ అందించలేదు. అయితే ఇది ఫేక్ అయ్యే అవకాశం కూడా లేకపోలేదు. ఒకవేళ ఇది నిజమైన వీడియోనే అయితే.. ఇటువంటి విషయాలు ఇకముందు జరగకుండా గూగుల్ జాగ్రత్తలను తీసుకోవాల్సిందే. ఎందుకంటే గూగుల్ ట్రాఫిక్ ను గుర్తించడానికి చేసే ప్రయత్నాలపై ఇది బలమైన ప్రభావం చూపిస్తుంది కాబట్టి. అయితే మీరు గూగుల్ మ్యాప్స్ పై నమ్మకం మాత్రం పూర్తిగా కోల్పోకండి. ఎందుకంటే ప్రతిసారీ 99 స్మార్ట్ ఫోన్లను కార్ట్ లో ఉంచుకుని ఎవరో ఒకరు రోడ్లమీద తిరుగుతూ ఉండరు కదా!