AC మెరుగ్గా పని చేసేందుకు ఈ టిప్స్ పాటించండి - ఇలా చేస్తే ఏసీ నుంచి మరింత చల్లగాలి

ప్రస్తుతం వేసవి కాలం నడుస్తోంది. దేశంలోని చాలా ప్రాంతాల్లో వేడిగాలులు వీస్తున్నాయి. ఉష్ణోగ్రతలు నానాటికీ అధిమవుతున్నాయి. ఇలాంటి వేడి పరిస్థితుల్లో ఎయిర్ కండీషనర్లు (Air Conditioners) ప్రజలకు ఉపశమనాన్ని కలిగిస్తున్నాయి. చాలా మంది ఏసీలను (ACs విరివిగా వినియోగిస్తున్నారు. అయితే కొన్ని టిప్స్ పాటిస్తే ఏసీలు మరింత మెరుగ్గా పని చేస్తాయి. ఇంకా చల్ల గాలిని అందిస్తాయి. ఇలా ఏసీలు మరింత బెస్ట్ పని చేసేందుకు ఈ కింది సూచనలు పాటించండి.

కూల్ మోడ్‌లోనే..
ప్రస్తుతం అధునాతన ఏసీల్లో విభిన్న మోడ్లు ఉంటాయి. కూల్, డ్రై, హాట్, ఫ్యాన్ ఇలా ఉంటాయి. ఏసీ నుంచి చల్లని గాలి వచ్చేందుకు కచ్చితంగా కూల్ మోడ్ ఉండాలి. అందుకే ఏసీ కూల్ మోడ్‌లో ఉందా లేదా చెక్ చేసుకోవాలి.

ఫిల్టర్లను చెక్ చేస్తుండాలి
ఏసీ ఫిల్టర్లు క్లీన్‌గా ఉన్నాయో లేదో తరచూ చెక్ చేస్తుండాలి. మంచి గాలి, కూలింగ్ కోసం కనీసం ప్రతీ రెండు వారాలకు ఒకసారి ఫిల్టర్లను శుభ్రం చేయాలి.

గది నుంచి గాలి బయటికి పోకుండా..
ఏసీ వినియోగిస్తున్నప్పుడు గదిలోని చల్లనిగాలి బయటికి పోకుండా జాగ్రత్త పడాలి. తలుపులు, కిటికీలు అన్ని సరిగా మూయాలి. అలాగే తలుపులను తరచూ తెరవకుండా ఉంటే మంచిది.

సూర్యరశ్మి విషయంలో..
మీ గదిలోకి సూర్య కిరణాలు నేరుగా పడుతుంటే.. రూమ్‌ను చల్లబరిచేందుకు ఏసీకి కాస్త కష్టంగా ఉంటుంది. అందుకే కిటికీల నుంచి గదిలోకి నేరుగా సూర్యరశ్మి పడకుండా కిటికీలకు కర్టన్స్ వేయాలి.

గది సైజ్ - ఏసీ కెపాసిటీ
పెద్ద గదిలో తక్కువ సామర్థ్యం ఉన్న ఏసీలను ఉంచితే కూడా కూలింగ్ అంత మెరుగ్గా ఉండదు. 100 చదరపు అడుగుల గదికి 1టన్, 150 చదరపు అడుగుల గదికి 1.5టన్, 200 చదరపు అడుగుల విస్తీర్ణం ఉన్న గదికి 2టన్ కెపాసిటీ ఉండే ఏసీలు సూటవుతాయి.

ఎక్కువ మంది ఉన్నా..
ఒకేగదిలో ఎక్కువ మంది ఉన్నా ఏసీ నుంచి వచ్చే చల్లటి గాలిపై ప్రభావం పడుతుంది. ఒకే రూమ్‍లో ఎక్కువ మంది ఉంటే కాస్త ఆలస్యంగా కూల్ అవుతుంది.

ఔట్‌డోర్ యూనిట్ ఇలా వద్దు
ఏసీకి చెందిన ఔట్‌‌డోర్ యూనిట్‌పై సూర్యరశ్మి నేరుగా పడకుండా జాగ్రత్త తీసుకోవాలి. వేసవి తీవ్రంగా ఉన్నప్పుడు ఇది కూడా ప్రభావం చూపుతుంది. అందుకే గదిని ఏసీ త్వరగా, మెరుగ్గా చల్లబరచాలంటే ఔట్‌డోర్ యూనిట్ నీడలో ఉండేలా చూసుకోండి. అలాగే ఔట్‌డోర్ యూనిట్ నుంచి వెళ్లే గాలికి ఎలాంటి అడ్డంకి లేకుండా చూసుకోవాలి.

రెగ్యులర్ సర్వీస్కూలింగ్ మెరుగ్గా ఉండేదుకు.. ఏసీకి సమయానుగుణంగా సర్వీస్ చేయించాలి. దీని వల్ల ఏసీ మంచి కండీషన్‌లో ఉంటుంది. సరైన కూలింగ్ ఇస్తుంది.