క్రిప్టో మార్కెట్ భారీ పతనం - లక్షల కోట్లు ఆవిరి - కారణాలు ఏంటంటే? - Cryptocurrency Market Crash

గ్లోబల్ క్రిప్టోకరెన్సీ మార్కెట్ (Global Cryptocurrency Market) విలువ పతనమవుతూనే ఉంది. రోజురోజుకూ పడిపోతూనే ఉంది. ఏకంగా 24 గంటల సమయంలోనే 1.88 ట్రిలియన్ డాలర్ల నుంచి 1.7 ట్రిలియన్ డాలర్లకు చేరింది. బిట్‌కాయిన్ (Bitcoin), ఇథేరియమ్ (Ethereum) సహా దాదాపు అన్ని ప్రముఖ క్రిప్టోకరెన్సీలు పడిపోతూనే ఉన్నాయి. ముఖ్యంగా బిట్‌కాయిన్ 36,000డాలర్ల దిగువకు పడిపోయింది. గత కొన్ని రోజులుగా క్రమంగా పతనమవుతూ పెట్టుబడిదారుల్లో ఆందోళన కలిగిస్తోంది. క్రిప్టో కరెన్సీ మార్కెట్ రెండు రోజుల్లోనే దాదాపు రూ.12లక్షల కోట్లు పతనమైంది. ఇన్వెస్టర్ల సంపద కరిగిపోతోంది.

బిట్‌కాయిన్ ఏకంగా 35,420 డాలర్ల (దాదాపు రూ.28,52,917)కు పడిపోయింది. మొత్తంగా ఒక్క నెలలోనే దాదాపు బిట్‌కాయిన్ విలువ 28శాతం వరకు పడిపోయింది. నెల క్రితం బిట్ కాయిన్ గరిష్ఠంగా రూ.38లక్షల వరకు వెళ్లింది. మరోవైపు ఇథెర్ (Ether)ది కూడా ఇదే పరిస్థితి. ఏకంగా ఒక్కనెలలోనే 40శాతం వరకు పడిపోయింది. మొత్తంగా ప్రస్తుతం ఇథేరియం 2,443 డాలర్లు (దాదాపు రూ.1,79,384) వద్ద ట్రేడ్ అవుతోంది. ఇక ఇయెర్న్ ఫైనాన్స్, డోజ్ కాయిన్ (Dogecoin) తో పాటు దాదాపు అన్ని ముఖ్యమైన క్రిప్టో కరెన్సీల విలువలు తగ్గిపోతూనే ఉన్నాయి.

Crypto Crash: కారణాలు ఏమిటంటే..
క్రిప్టో కరెన్సీపై బ్యాన్ విధించాలని రష్యా సెంట్రల్ బ్యాంక్ (Russian Central Bank) ప్రతిపాదించడమే శుక్రవారం క్రిప్టో మార్కెట్ భారీ పతనానికి ప్రధాన కారణంగా ఉంది. రష్యాలో క్రిప్టో కరెన్సీ మైనింగ్ తో పాటు అన్ని కార్యకలాపాలను నిషేధించాలని సెంట్రల్ బ్యాంక్ ఆఫ్ రష్యా.. ఆ దేశ ప్రభుత్వానికి సిఫారసు చేసింది.

అలాగే ప్రజల ఆర్థిక స్థిరత్వానికి క్రిప్టో కరెన్సీ ప్రమాదమని కూడా రష్యా సెంట్రల్ బ్యాంకు అభిప్రాయపడింది. పౌరుల ఆర్థిక భద్రత దృష్టా క్రిప్టోను నిషేధించాలని బ్యాంకు పేర్కొంది. దీంతో క్రిప్టో మార్కెట్ విలువ మరింతగా పడిపోతూనే ఉంది.

ఇతర కారణాలు ఇవే..
క్రిప్టో కరెన్సీని బ్యాన్ చేయాలని రష్యా సెంట్రల్ బ్యాంకు ఆ దేశానికి ప్రతిపాదించక ముందు కూడా కొన్ని రోజులుగా బిట్‌కాయిన్, ఇథేరియమ్ సహా చాలా కరెన్సీలు పడిపోతూనే ఉన్నాయి. అమెరికా ఫెడరల్ బ్యాంకు (US Federal Reserve) వడ్డీ రేట్లను పెంచనుందనే అంచనాలు కూడా క్రిప్టో పతనానికి మరో కారణం.

దేశంలో పెరుగుతున్న ద్రవ్యోల్బణాన్ని నియంత్రించేందుకు ఫెడ్ బ్యాంకు.. అమెరికాలో వడ్డీ రేట్లను పెంచుతుందనే అంచనాలు బలంగా ఉన్నాయి. పెట్టుబడులను ఆకర్షించేందుకు ఫెడ్ ప్రయత్నిస్తోంది. దీంతో క్రిప్టో కరెన్సీ లాంటి రిస్క్ ఎక్కువగా ఉన్న వాటిలో పెట్టుబడులను ఉపసంహరించుకుంటున్నారు ఇన్వెస్టర్లు. బాండ్లు కొనేందుకు ఆసక్తి చూపుతున్నారు.
కాగా కొందరు ఇన్వెస్టర్లు.. లివరేజ్డ్ లాంగ్ పొజిషన్లు అమ్మేస్తుండడం కూడా క్రిప్టో పతనానికి ఓ కారణంగా ఉంది.