14 ఐఫోన్లతో పరారైన డెలివరీ బాయ్.. ఎలా దొరికాడంటే?

ప్రముఖ స్మార్ట్ ఫోన్ బ్రాండ్ యాపిల్ ఇటీవలే ఐఫోన్ 12 సిరీస్ ఫోన్లను లాంచ్ చేసిన సంగతి తెలిసిందే. వీటిలో ఐఫోన్ 12 ప్రో మ్యాక్స్ స్మార్ట్ ఫోన్ అత్యంత శక్తివంతమైన స్మార్ట్ ఫోన్. దీంతో పాటు అత్యంత ఖరీదైన ఫోన్ కూడా ఇదే. దీంతోపాటు వీటికి డిమాండ్ కూడా ఎక్కువగానే ఉంటుంది. అయితే ఒక డెలివరీ బాయ్ 14 ఐఫోన్ 12 ప్రో మ్యాక్స్‌లు తీసుకుని పారిపోయిన సంఘటన చైనాలో జరిగింది.

Also Read: Netflix StreamFest: ఫ్రీగా నెట్‌ఫ్లిక్స్.. ఎన్ని రోజులు? ఎలా ఉపయోగించాలి?

చైనా షిప్‌మెంట్ కంపెనీలో పనిచేసే టాంగ్ అనే వ్యక్తి 14 కొత్త ఐఫోన్ 12 ప్రో మ్యాక్స్ యూనిట్లను యాపిల్ అధికారిక స్టోర్ నుంచి ఇతర యాపిల్ స్టోర్ల నుంచి తీసుకురావాల్సి ఉంది. అయితే టాంగ్ వాటిని తీసుకుని పారిపోవాలని నిర్ణయించుకున్నాడు. దీంతో ఆ 14 ఐఫోన్లను తీసుకున్నాక ఆర్డర్లను క్యాన్సిల్ చేశాడు. ఈ ఆర్డర్‌ను నవంబర్ 14వ తేదీన చేశారు. టాంగ్ వాటిని గుయాంగ్ యాపిల్ స్టోర్ నుంచి తీసుకున్నాడు. అయితే ఆ వెంటనే ఆ ఫోన్లతో పారిపోయాడు.

ఏకంగా 14 ఐఫోన్లతో పారిపోవడంతో అతడిని పట్టుకోవడానికి యాపిల్ ఉద్యోగులు మాస్టర్ ప్లాన్ వేయాల్సి వచ్చింది. అతను నాలుగు ఐఫోన్లను ఓపెన్ చేశాడు. వీటిలో ఒకదాన్ని వ్యక్తిగతంగా ఉపయోగిస్తూ ఉండగా, మిగతా మూడిటిని అత్యంత తక్కువ ధరకు విక్రయించాడు. అతను ఉపయోగించే ఫోన్‌ను ట్రాక్ చేయడం ద్వారా పోలీసులు టాంగ్‌ను పట్టుకున్నారు. ముందు అతని వద్దనున్న 10 స్మార్ట్ ఫోన్లు స్వాధీనం చేసుకుని తర్వాత మిగతా మూడిటిని కూడా రికవరీ చేశారు.

Also Read: ఒక్క క్లిక్‌తో చేయి ఎత్తవచ్చు.. కొత్త ఫీచర్ తీసుకొచ్చిన గూగుల్!

ఎప్పుడైనా మీరు ఏదైనా ఆర్డర్ చేసినప్పుడు ఆ డెలివరీ బాయ్ ఆర్డర్ క్యాన్సిల్ అని చెప్పాడంటే.. మీరు మీ అకౌంట్లో ఆర్డర్ స్టేటస్‌ను చెక్ చేసుకోండి. ఒకవేళ డెలివరీ బాయ్ మిమ్మల్ని గందరగోళానికి గురి చేస్తే వెంటనే కస్టమర్ కేర్‌కు ఫోన్ చేసి విషయంపై పూర్తి స్పష్టత తెచ్చుకోండి. అంతేకాకుండా మీరు అందుకున్న ఉత్పత్తి సరైనది కాదని మీకు అనిపిస్తే.. దాన్ని అసలు తీసుకోకండి. ఏవైనా ఖరీదైన ఉత్పత్తులు ఆర్డర్ చేసినప్పుడు డెలివరీ బాయ్స్‌ను మీ ముందే ఆ బాక్సులు ఓపెన్ చేయమని చెప్పండి. దీంతోపాటు అతను అన్ బాక్స్ చేసేటప్పుడు దాన్ని వీడియో రికార్డు చేయండి.