Google Play Store : త్వరలో మాయం కానున్న 15లక్షల యాప్స్ ! ప్లే స్టోర్, యాపిల్ స్టోర్ నుంచి - కారణాలు ఇవే..

గూగుల్ ప్లే స్టోర్ (Google Play Store), యాపిల్ యాప్ స్టోర్ (Apple App Store) త్వరలో భారీ సంఖ్యలో యాప్స్‌ను తొలగించనున్నాయని సమాచారం. దాదాపు 15లక్షల వరకు యాప్స్‌ను టెక్ దిగ్గజాలు గూగుల్ (Google) , యాపిల్ (Apple) తమ ప్లాట్‌ఫామ్‌ల్లో తీసివేసేందుకు సిద్ధమయ్యాయి. గూగుల్ ప్లే స్టోర్‌లో దాదాపు 8.69లక్షల ఆండ్రాయిడ్, యాపిల్ యాప్‌ స్టోర్‌లో సుమారు 6.50లక్షల ఐఓఎస్ యాప్స్ త్వరలో మాయం కానున్నట్టు తెలుస్తోంది. చాలా కాలం నుంచి అప్‌డేట్‌ కానీ యాప్స్‌కు సంబంధించి వాటి డెవలపర్లకు గూగుల్, యాపిల్ వార్నింగ్ పంపాయి. యాప్స్ అప్‌డేట్‌ చేయాలంటూ సూచించాయి. నిర్ణీత గడువు విధించి.. ఆలోగా అప్‌డేట్‌ చేయకపోతే యాప్‌ స్టోర్ నుంచి తొలగిస్తామని యాపిల్ హెచ్చరికలు కూడా చేసిందని సమాచారం. అలాగే ప్లేస్టోర్‌లో చాలా కాలం నుంచి అప్‌డేట్‌ కాని ఆండ్రాయిడ్ యాప్స్‌ను ప్లేస్టోర్ నుంచి తొలగించేందుకు గూగుల్ కూడా రెడీ అయింది. పూర్తి వివరాలు..

గూగుల్ ప్లే స్టోర్, యాపిల్ యాప్‌ స్టోర్ ప్లాట్‌ఫామ్‌ల నుంచి 15లక్షల యాప్స్ తొలగించే అవకాశం ఉందని పిక్సెలేట్ (Pixalate) రిపోర్ట్ వెల్లడించింది. దీంతో యాపిల్ యాప్‌ స్టోర్‌లోని దాదాపు 30శాతం యాప్స్ మాయం కానున్నాయని అంచనా వేసింది. రెండు సంవత్సరాలు అప్‌డేట్‌ కాని యాప్స్‌ను అబాండోన్డ్‌ (Abandoned) గా పరిగణించి తొలగించేందుకు గూగుల్, యాపిల్ సిద్దమయ్యాయని చెప్పింది. ఇందులో ఎక్కువగా ఎడ్యుకేషన్, గేమ్స్‌, రిఫరెన్స్ లాంటి కేటగిరీలకు చెందిన యాప్స్ ఉన్నాయట.

కాగా, రెండు ప్లాట్‌ఫామ్‌ల్లో కలిపి 3.14లక్షల సూపర్ అబాండోన్డ్ (Super Abandoned) యాప్స్ ఉన్నాయని పిక్సెలేట్ వెల్లడించింది. అంటే ఐదు సంవత్సరాల నుంచి ఎలాంటి అప్‌డేట్‌ లేని యాప్స్ ఇవి. యాప్‌ స్టోర్‌లో 1.84లక్షలు, గూగుల్ ప్లే స్టోర్‌లో 1.3లక్షలు ఇలాంటి యాప్స్ ఉన్నాయట.

అప్‌డేట్‌ కానీ యాప్స్‌ను యాప్‌ స్టోర్ నుంచి తొలగించినా.. అప్పటికే డౌన్‌లోడ్ చేసుకున్న వారి మొబైళ్లలో అలానే ఉంటాయని యాపిల్ వెల్లడించింది. మరోవైపు ఆండ్రాయిడ్‌ మొబైళ్లలోనూ పరిస్థితి ఇలానే ఉండనుంది. మరోవైపు Abandoned యాప్స్‌ను ప్లే స్టోర్‌లో హైడ్ చేసి.. యూజర్లు డౌన్‌లోడ్ చేసుకోకుండా గూగుల్ చర్యలు తీసుకోనుంది. ఒకవేళ డెవలపర్ అప్‌డేట్‌ చేస్తే మళ్లీ అందుబాటులోకి తెచ్చే అవకాశం ఉంటుందని సమాచారం.

ఎక్కువ కాలం నుంచి అప్‌డేట్‌ కాని యాప్స్ వల్ల డివైజ్‌లకు సెక్యూరిటీ ప్రమాదం పొంచి ఉంటుందన్న కారణంగా గూగుల్, యాపిల్ ఈ అబాండోన్డ్ యాప్స్‌ను తొలగించేందుకు నిర్ణయించుకున్నాయి. ఒకవేళ యాప్స్ అప్‌డేట్‌ కాకుంటే సెక్యూరిటీ ప్యాచెస్ ఉండవు. అలాగే బగ్స్ కూడా సమస్యలు సృష్టించే అవకాశం ఉంటుంది.

Also Read: వాట్సాప్‌లో చాలా మందికి తెలియని ఫీచర్లు ! బోల్డ్ టెక్స్ట్, స్టార్ మెసేజ్‌లు సహా మరిన్ని..
Also Read: Netflix live: నెట్‌ఫ్లిక్స్ మరో ప్రయోగం - కొత్త తరహా ఎంటర్‌టైన్‌మెంట్‌తో ఆకట్టుకునేందుకు ప్లాన్‌