Loan Appsపై గూగుల్ కొరడా.. ప్లే స్టోర్ నుంచి 2000వేలకుపైగా యాప్స్ డిలీట్!

Loan Apps : చాలా లోన్ యాప్స్ యూజర్ల సమాచారాన్ని చేతుల్లోకి తీసుకొని వేధింపులకు పాల్పడుతున్న ఘటనలు ఇటీవల ఎన్నో వెలుగులోకి వచ్చాయి. రుణం తీసుకున్న వారి మొబైల్‌లోని కాంటాక్ట్‌లతో పాటు ఇతర వివరాలను నిబంధనలకు విరుద్ధంగా సేకరించి దుర్వినియోగం చేసిన సందర్భాలు ఉన్నాయి. ఆ సమాచారంతో రుణం తీసుకున్న వారిని అధిక వడ్డీల కోసం వివిధ రకాలు వేధించిన ఘటన జరిగాయి. ఈ నేపథ్యంలో నిబంధనలకు విరుద్ధంగా ఉన్న లోన్ యాప్స్‌పై గూగుల్ ( Google ) కొరడా ఘుళిపిస్తోంది. ప్లే స్టోర్ ( Google Play Store ) నుంచి గుర్తించి తొలగిస్తోంది. రానున్న రోజుల్లో ఇలాంటి యాప్స్ కోసం మరింత కఠిన నిబంధనలను తీసుకువచ్చేందుకు సిద్ధమైంది. ఈ వివరాలను గూగుల్ ఏపీఏసీ (ఆసియా పసిఫిక్ రీజియన్) ట్రస్ట్, సెఫ్టీ హెడ్, సీనియర్ డైరెక్టర్ సైకత్ మిత్రా ( Saikat Mitra ) వెల్లడించారు. ఢిల్లీలో జరిగిన ఓ ఈవెంట్‌లో ఆయన మాట్లాడారు.

ఈ సంవత్సరం జనవరి నుంచి ఇప్పటి వరకు ప్లే స్టోర్ నుంచి 2,000కుపైగా లోన్ యాప్స్‌ను గూగుల్ తొలగించిందని సైకత్ మిత్రా తెలిపారు. స్థానిక ప్రభుత్వాల నిబంధనల మేర గూగుల్ నడుచుకుంటుందని తెలిపారు. యూజర్ల సేఫ్టీ గూగుల్‌కు అత్యంత ప్రాధాన్యమని ఆయన స్పష్టం చేశారు. రిజర్వ్ బ్యాంక్ ఆఫ్ ఇండియా (RBI), లా ఎన్‌ఫోర్స్‌మెంట్ ఏజెన్సీల నిబంధనలను పాటించని, యూజర్ల నుంచి నెగిటివ్ ఫీడ్ బ్యాక్ వచ్చిన యాప్స్‌ను కూడా గూగుల్ డిలీట్ చేసింది.

భవిష్యత్తులో యాప్స్ చెకింగ్‌ను మరింత కట్టుదిట్టంగా చేస్తామని సైకత్ చెప్పారు. “చాలా పాలసీను మార్చే ప్రక్రియ జరుగుతోంది. ఈ విషయంపై మేమంతా పని చేస్తున్నాం. రానున్న వారాల్లో ఇవి అమలులోకి వస్తాయి” అని పేర్కొన్నారు. తప్పుడు సమాచారం ఇచ్చిన, సరైన వివరాలు ఇవ్వని, పాలసీలను ఉల్లంఘించిన 2,000లకు పైగా లోన్ యాప్స్‌ను ప్లే స్టోర్ నుంచి గూగుల్ తొలగించిందని సైకత్ మిత్రా ప్రకటించారు. ప్రభుత్వాలతో పాటు ఆర్థిక సంస్థల సలహాలను సేకరించి కొత్త నిబంధనలు, పాలసీలను రూపొందిస్తామని ఆయన చెప్పారు.

మరోవైపు నిబంధనలు పాటించకుండా ఎడాపెడా వడ్డీలు వసూలు చేస్తున్న కొన్ని లోన్ యాప్స్‌ను నిషేధించాలని ఇటీవల డిమాండ్లు వినిపిస్తున్నాయి. రుణాలకు అధిక వడ్డీలు వేస్తూ చెల్లించకపోతే వేధిస్తున్న యాప్స్‌‌పై చాలా మంది ఆగ్రహం వ్యక్తం చేస్తున్నారు.

Also Read: BGMI Game Ban : గేమర్లకు షాక్.. బ్యాటిల్‌గ్రౌండ్స్ మొబైల్ ఇండియా BGMI గేమ్‌ బ్యాన్.. వివరాలివే