Real Money Games : డబ్బులాటలకు గూగుల్ రైట్‌రైట్! ప్లేస్టోర్‌లో ఆ గేమ్స్ రానున్నాయి

రియల్ మనీ గేమ్స్ (Real Money Games) మన దేశంలో చాలా పాపులర్. రియల్ మనీ గేమ్స్‌ అంటే యాప్‌లో డబ్బు డిపాజిట్ చేసి.. తెలివిని ఉపయోగించి గ్యాబ్లింగ్‌లా ఆడే ఆటలు. ఉదాహరణకు రమ్మీ గేమ్స్ (Rummy Games)తో పాటు డ్రీమ్ 11 (Dream 11), మొబైల్‌ ప్రీమియర్ లీగ్ (Mobile Premier League) లాంటి డైలీ ఫాంటసీ గేమ్స్‌. ఈ గేమ్స్‌కు భారత్‌లో కోట్ల మంది యూజర్లు ఉన్నారు. మన దేశ గేమింగ్ ఇండస్ట్రీ ఆదాయంలో ఈ రియల్ మనీ యాప్స్‌దే 51 శాతం వాటా. అయితే రియల్‌ మనీ గేమ్స్‌, యాప్స్‌ను డౌన్‌లోడ్ చేసుకోవాలంటే.. ఆయా యాప్స్‌కు చెందిన వెబ్‌సైట్‌లకు వెళ్లాల్సి వచ్చేది. గూగుల్ ప్లే స్టోర్‌ (Google Play Store) లో ఈ రియల్ మనీ గేమ్స్‌కు అనుమతి లేదు. అయితే వీటిని ప్లే స్టోర్‌లోకి ప్రయోగాత్మకంగా తీసుకురావాలని గూగుల్ (Google) నిర్ణయించుకుంది. ఈ రియల్ మనీ గేమ్స్‌.. యాప్‌ స్టోర్‌లోకి ఎప్పుడు రానున్నాయి.. సవాళ్లు ఏంటో చూడండి.

రమ్మీ యాప్స్, డైలీ ఫాంటసీ స్పోర్ట్స్ (DFS) యాప్స్‌ను ప్రయోగాత్మకంగా పరిమిత కాలం ప్లే స్టోర్‌లో అందుబాటులోకి తీసుకురానున్నట్టు గూగుల్ ప్రకటించింది. సెప్టెంబర్ 28 నుంచి క్రమంగా ఈ యాప్స్ ప్లే స్టోర్‌లోకి రానున్నాయి. ప్రస్తుతం రియల్ మనీ యాప్స్‌లో డ్రీమ్ 11 (Dream 11), మొబైల్‌ ప్రీమియర్ లీగ్ (Mobile Premier league), గేమ్స్‌ 24x7 (Game 24x7) టాప్‌ గేమ్స్‌గా ఉన్నాయి. వేలాది యాప్స్ కూడా నడుస్తున్నాయి. ఇప్పటి వరకు ప్లేస్టోర్‌లో లేకపోయినా ఈ యాప్స్‌ను కోట్లాది మంది వేరే సోర్స్ నుంచి డౌన్‌లోడ్ చేసుకొని వినియోగిస్తున్నారు. ఈ పైలట్ ప్రాజెక్టులో భాగంగా ఈ యాప్స్ కూడా ప్లే స్టోర్‌లోకి రానున్నాయి. రూల్స్‌కు, స్థానిక ప్రభుత్వాల నిబంధనలకు అనుగుణంగా ఉన్న రియల్ మనీ గేమ్స్‌నే ప్లే స్టోర్‌లోకి గూగుల్ అనుమతించనుంది.

సెప్టెంబర్ 28 నుంచి సంవత్సరం పాటు ప్రయోగాత్మకంగా ప్లే స్టోర్‌లో ఈ రియల్ మనీ యాప్స్‌ను గూగుల్ అందుబాటులో ఉంచనుంది. అయితే ప్రస్తుతానికి కొన్ని యాప్స్ మాత్రమే తెచ్చే అవకాశం ఉంది. గూగుల్ ఇన్ యాప్‌ బిల్లింగ్‌ను ఈ యాప్స్ వినియోగించుకోలేవు. లోకల్ డెవలపర్స్‌ విజయవంతంగా, నిబంధనలకు అనుగుణంగా బిజినెస్ చేసుకునేలా సదుపాయం కల్పించేందుకు తాము ఈ అవకాశాన్ని ఇస్తున్నామని గూగుల్ పేర్కొంది.

ఇప్పటి వరకు రియల్‌ మనీ గేమ్స్ గూగుల్ ప్లే స్టోర్‌లో లేవు. పేటీఎంలో ఇలాంటి గ్యాంబ్లింగ్ గేమ్స్‌ ఉన్నాయన్న కారణంతో 2020 సెప్టెంబర్‌లో ఆ యాప్‌ను ప్లే స్టోర్‌లో కొన్ని గంటల పాటు గూగుల్ తొలగించింది. ఆ తర్వాత మళ్లీ పునరుద్ధరించింది. ఇప్పుడు పైలట్ ప్రాజెక్ట్ కింద గూగులే.. ప్లే స్టోర్‌లో రియల్ మనీ యాప్స్‌ను ప్రవేశపెడుతోంది.

అయితే మన దేశంలోని ఆంధ్రప్రదేశ్, తెలంగాణ‌తో పాటు అరుణాచల్ ప్రదేశ్, అసోం, ఒడిశా రాష్ట్రాల్లో ఇప్పటికే ఈ రియల్ మనీ గేమ్స్‌ నిషేధానికి గురయ్యాయి. ఇలాంటి గేమ్స్‌ వల్ల ప్రజలు డబ్బు కోల్పోతున్నారని ఆయా ప్రభుత్వాలు బ్యాన్ విధించాయి. ప్లే స్టోర్‌లో వచ్చినా ఈ రాష్ట్రాల్లో ఆ గేమ్‌లను డబ్బు పెట్టి అడేందుకు కుదరకపోవచ్చు.
Read More Latest Tech News and Telugu News