స్మార్ట్‌వాచ్‌లు, TWS సహా వేరబుల్స్ సేల్స్ జోరు - భారత బ్రాండ్‌లదే హవా | Smartwatches

స్మార్ట్‌వాచ్‌లు (Smartwatches), ఇయర్‌ఫోన్స్, TWS ఇయర్‌బడ్స్ లాంటి వేరబుల్స్ అమ్మకాలు గణనీయంగా పెరుగుతున్నాయి. ముఖ్యంగా స్మార్ట్‌వాచ్‌లు దూసుకుపోతున్నాయి. ఈ నేపథ్యంలో ఈ సంవత్సరం తొలి త్రైమాసికంలో భారత వేరబుల్స్ మార్కెట్ మంచి వృద్ధి సాధించింది. 2021 తొలి క్వార్టర్‌తో పోలిస్తే 20.1 శాతం వృద్ధి కనబరిచింది. ఇందులో ప్రధానపాత్ర స్మార్ట్‌వాచ్‌లదే. ఈ గణాంకాలను ఇంటర్నేషనల్ డేటా కార్పొరేషన్ (IDC) వెల్లడించింది. అలాగే ఏ బ్రాండ్స్ టాప్‌లో నిలిచాయి.. ఎన్ని యూనిట్లు సేల్‌ అయ్యాయి అన్న విషయాలను పేర్కొంది.

ఈ సంవత్సరం జనవరి, మార్చి మధ్య భారత్‌లో 37లక్షల స్మార్ట్‌వాచ్‌లు షిప్ అయినట్టు ఐడీసీ పేర్కొంది. 2021 తొలి క్వార్టర్‌తో పోలిస్తే ఇది 173 శాతం అధికం. అయితే వాచ్‌ల ఆధిపత్యం పెరగడంతో వ్రిస్ట్ బ్యాండ్ల అమ్మకాలు తగ్గుదల కనిపించింది. గత సంవత్సరం తొలి క్వార్టర్‌తో పోలిస్తే ఈ బ్యాండ్ల అమ్మకాల్లో 65శాతం తగ్గుదల నమోదైంది.

ఇయర్‌ఫోన్స్, టీడబ్ల్యూఎస్‌ ఇయర్‌బడ్స్ లాంటి ఇయర్‌వేర్ అమ్మకాలు కూడా పెరిగాయి. మొత్తంగా గత సంవత్సరంతో పోలిస్తే 4.9శాతం వృద్ధి కనబరిచింది. అయితే వేరబుల్స్‌ కేటగిరీలో మొత్తంలో 71.3శాతం ఇయర్‌వేర్ దక్కించుకుంది.

భారత వేరబుల్స్ మార్కెట్‌లో దేశీయ కంపెనీ బోట్ (boAt) మరోసారి సత్తాచాటింది. 2022 తొలి క్వార్టర్‌లో మొత్తంగా 22.9 మార్కెట్ వాటాతో అగ్రస్థానంలో నిలిచింది. ఆ తర్వాత భారత్‌కే చెందిన నాయిస్ (Noise) సంస్థ ఏకంగా 150.1 శాతం వృద్ధితో 10.9 మార్కెట్ వాటాను సొంతం చేసుకుంది. రెండో స్థానాన్ని దక్కించుకుంది. ఇక వన్‌ప్లస్‌ (OnePlus) కంపెనీ 13.8 షేర్‌తో మూడో స్థానంలో నిలిచింది. అయితే 2021 తొలి క్వార్టర్‌తో పోలిస్తే సేల్స్‌లో 35.8శాతం క్షీణత నమోదు చేసింది.
భారత వేరబుల్స్ మార్కెట్‌లో 6.6 శాతం వాటాతో ఇండియా బ్రాండ్ ఫైర్ బోల్ట్ (Fire- Boltt) నాలుగో స్థానానికి వచ్చింది. రియల్‌మీ (Realme) 6.6 శాతంతోనే ఐదో ప్లేస్‌లో నిలిచింది. అయితే ఫైర్‌బోల్ట్ ఏకంగా 1522.2 శాతం వృద్ధిని నమోదు చేసి అదరగొట్టింది.

“అధిక డిస్కౌంట్లు, కొత్త ఫీచర్లు, బ్రాండ్ల ప్రమోషన్ల వల్ల వేరబుల్స్‌లో స్మార్ట్‌వాచ్‌ల అమ్మకాలు అధికంగా ఉన్నాయి. వాచ్‌లతో పాటు TWS ఇయర్‌బడ్స్ సేల్స్ కూడా పెరిగాయి. అయితే రవాణా ఇంకా ఈ ఇండస్ట్రీకి సవాల్‌గానే ఉంది. ముఖ్యంగా 50డాలర్ల (సుమారు రూ.3,800) కేటగిరీలో పోటీ అధికంగా ఉంది. ఈ రేంజ్‌లో దాదాపు అన్ని బ్రాండ్లు దూకుడుగా ఉన్నాయి. ధర, ఫీచర్లు, డివైజ్ డిజైన్ విషయంలో పోటీ పడుతున్నాయి” అని IDC ఇండియా సీనియర్ మార్కెటింగ్ అనలిస్ట్ అనీషా డుంబ్రే పేర్కొన్నారు. 2022లో వేరబుల్స్ మార్కెట్ మరింత వృద్ధి చెందుతుందని అంచనా వేశారు.