Internet Explorer : గుడ్‌బై.. ఇంటర్నెట్ ఎక్స్‌ప్లోరర్ - 27 సంవత్సరాల సర్వీస్ తర్వాత రిటైర్మెంట్.. ఎందుకిలా?

Internet Explorer Retirement : ఓల్డెస్ట్ వెబ్‌బ్రౌజర్ ఇంటర్నెట్ ఎక్స్‌ప్లోరర్‌ (Internet Explorer) కు కాలం చెల్లే తరుణం వచ్చేసింది. 27 సంవత్సరాల సర్వీస్ తర్వాత ఈ బ్రౌజర్ రిటైర్ అవనుంది. ఇంటర్నెట్ ఎక్స్‌ప్లోరర్ సేవలు ఈనెల 15వ తేదీ అంటే రేపు నిలిచిపోనున్నాయి. అంటే రేపటి నుంచి ఇంటర్నెట్ ఎక్స్‌ప్లోరర్ ఇక పని చేయదు. ఈ విషయాన్ని మైక్రోసాఫ్ట్ అధికారికంగా ప్రకటించింది.

1995లో ఇంటర్నెట్ ఎక్స్‌ప్లోరర్‌ను మైక్రోసాఫ్ట్ తీసుకొచ్చింది. విండోస్ 95తో పాటుగా లాంచ్ చేసింది. ఆ తర్వాత విడిగా వెబ్ బ్రౌజర్‌గానూ అందుబాటులోకి తెచ్చింది. 1996 నుంచి ఇంటర్నెట్ ఎక్స్‌ప్లోరర్ ఆధిపత్యం చెలాయించింది. ఏకంగా 95శాతం యూసేజ్‌తో టాప్‌ మోస్ట్ యూజింగ్ బ్రౌజర్‌గా వెలుగొందింది. అయితే ఆ తర్వాతి నుంచి పరిస్థితి మారిపోయింది.

ఇంటర్నెట్ ఎక్స్‌ప్లోరర్‌కు క్రమంగా పోటీ పెరిగిపోయింది. దాని కంటే మంచి యూజర్ ఇంటర్ఫేస్, ఇంటర్నెట్ స్పీడ్స్, స్మూత్ పర్ఫార్మెన్స్‌తో బ్రౌజర్లు వచ్చాయి. ముఖ్యంగా గూగుల్ క్రోమ్, మోజిల్లా ఫైర్‌ఫాక్స్‌ నుంచి తీవ్రమైన పోటీ ఏర్పడింది. మైక్రోసాఫ్ట్ కూడా ఎడ్జ్ బ్రౌజర్‌ను తీసుకొచ్చింది. దీంతో ఇంటర్నెట్ ఎక్స్‌ప్లోరర్ వాడకం చాలా తగ్గిపోయింది. చాలా స్లోగా ఉందంటూ యూజర్లు కూడా ఫిర్యాదులు చేశారు.

భవిష్యత్ ఇంటర్నెట్ ఎక్స్‌ప్లోరర్ ఇక ఎడ్జ్ (Microsoft Edge) బ్రౌజర్ అని మైక్రోసాఫ్ట్ పేర్కొంటోంది. ఎడ్జ్ బ్రౌజర్ వాడాలని యూజర్లకు చెబుతోంది. “మైక్రోసాఫ్ట్ ఎడ్జ్ ఫాస్ట్‌గా ఉండడమే కాదు.. చాలా సెక్యూర్‌గా ఉంటుంది. ఇంటర్నెట్ ఎక్స్‌ప్లోరర్ కన్నా ఎంతో మెరుగైన బ్రౌజింగ్ ఎక్స్‌పీరియన్స్ ఇస్తుంది. పాత వెర్షన్‌లకు కూడా సపోర్ట్ చేస్తుంది” అని పేర్కొంది.

2016 నుంచే ఇంటర్నెట్ ఎక్స్‌ప్లోరర్‌కు కొత్త ఫీచర్లను ఇవ్వడం మైక్రోసాఫ్ట్ ఆపేసింది. ముఖ్యంగా ఎడ్జ్ బ్రౌజర్‌ను తీసుకొచ్చాక ఈ పాత బ్రౌజర్ గురించి పట్టించుకోలేదు. ఇంటర్నెట్ ఎక్స్‌ప్లోరర్‌ను ఆపేయాలని మైక్రోసాఫ్ట్ అప్పుడే నిర్ణయించుకొని ఉండవచ్చు. అయితే ఇప్పుడు దాన్ని అమలు చేస్తోంది. ఇక రేపటి నుంచి ఇంటర్నెట్ ఎక్స్‌ప్లోరర్ అనేది గతంగా ఉండనుంది.

ఇక ఇంటర్నెట్ ఎక్స్‌ప్లోరర్ నిలిచిపోవడంతో ట్విట్టర్‌లో యూజర్లు రకరకాలుగా స్పందిస్తున్నారు. కొందరు బాధను వ్యక్తం చేయగా.. మరికొందరు జోక్‌లు పేలుస్తున్నారు. వేరే బ్రౌజర్లు వాడేందుకు సహకరించిన ఇంటర్నెట్ ఎక్స్‌ప్లోరర్‌కు థ్యాంక్స్ అంటూ ఓ యూజర్ పోస్ట్ చేశారు. శకం ముగిసింది అంటూ మరికొందరు తాము మొదట్లో వాడిన ఈ బ్రౌజర్‌ను తలుచుకుంటున్నారు. ఇలా సోషల్ మీడియాలో ఇంటర్నెట్ ఎక్స్‌ప్లోరర్ బ్రౌజర్ రిటైర్మెంట్‌పై యూజర్లు అభిప్రాయాలు వ్యక్తం చేస్తూనే ఉన్నారు.