ఐఫోన్ 12 మినీలో సమస్య.. ప్రస్తుతానికి ఇలా చేస్తే చాలు!

ఐఫోన్ 12 మినీ స్మార్ట్ ఫోన్ కొన్న వినియోగదారులు టచ్ స్క్రీన్ సమస్యను ఎదుర్కొంటున్నట్లు చెబుతున్నారు. ఫోన్ కొన్న మొదటి రోజు నుంచి ఈ సమస్యను వారు ఎదుర్కొంటున్నారని అంటున్నారు. స్క్రీన్ లాక్ చేసినప్పుడు కెమెరాను కానీ, ఫ్లాష్ లైట్‌ను కానీ ఉపయోగించేటప్పుడు ఈ సమస్య ఎదురవుతోందని తెలుస్తోంది. అన్ లాక్ చేయడానికి స్క్రీన్ స్వైప్ చేస్తున్నా కూడా పనిచేయడం లేదని తెలుస్తోంది. అయితే దీనిపై యాపిల్ ఇంతవరకు స్పందించలేదు. ఈ సమస్యకు కారణం ఏంటి? సాఫ్ట్ వేర్ అప్ డేట్ ద్వారా దీన్ని ఫిక్స్ చేస్తారా? అనే విషయాలు తెలియాల్సి ఉంది.

Also Read: ఎంఐ, రెడ్‌మీ, పోకో ఫోన్లలో అతి పెద్ద సమస్య.. ఇలా అస్సలు చేయకండి!

యాపిల్ ఫోరంలు, మ్యాక్‌రూమర్ ఫోరంలు, రెడిట్.. దీనికి సంబంధించిన ఫిర్యాదులతో నిండిపోయాయి. ఫోన్‌కు కేస్, స్క్రీన్ ప్రొటెక్టర్ వేసినప్పుడే ఈ సమస్య వచ్చినట్లు తెలుస్తోంది. ఈ ప్రభావం పడ్డ వినియోగదారులు.. లాక్ స్క్రీన్‌లో ఉన్నప్పుడు కెమెరా, ఫ్లాష్ లైట్ ఓపెన్ చేయలేకపోవడం, స్వైప్ కూడా ఓపెన్ కాకపోవడం వంటి సమస్యలు ఎదురవుతున్నాయి.

ఒకసారి అన్ లాక్ చేశాక మాత్రం ఎటువంటి సమస్యలూ లేకుండా చాలా సాధారణంగా ఈ ఫోన్ పనిచేస్తోంది. యాపిల్ ఈ సమస్యను ఇంతవరకు గుర్తించలేదు. కాబట్టి ప్రస్తుతానికి ఈ ఫోన్ ఉపయోగించేవారు స్క్రీన్ ప్రొటెక్టర్ లేదా కేస్‌తో కాకుండా సాధారణంగా ఉపయోగిస్తే.. ఈ సమస్య తలెత్తదు. ఈ రెండూ వేసినప్పుడే ఈ సమస్య వస్తోందని వినియోగదారులు అంటున్నారు. అయితే ఈ సమస్య తలెత్తినప్పుడు చార్జింగ్ పెడితే పరిష్కారం అవుతుందని తెలుస్తోంది. యాపిల్ తన బ్రాండ్ వాల్యూకి అమితమైన ప్రాధాన్యతను ఇస్తుంది కాబట్టి త్వరలో దీనికి సంబంధించిన క్లారిటీ వచ్చే అవకాశం ఉంది.

Also Read: పడిపోయిన జియో డౌన్‌లోడ్ స్పీడ్.. కానీ ఇప్పటికీ నంబర్‌వన్ అదే.. వెల్లడించిన ట్రాయ్!

ఐఫోన్ 12 మినీ సేల్ మనదేశంలో కొద్ది రోజుల కిందటే ప్రారంభం అయింది. దీని ధర మనదేశంలో రూ.69,900 నుంచి ప్రారంభం అయింది. 128 జీబీ వేరియంట్ ధర రూ.74,900గానూ, 256 జీబీ వేరియంట్ ధర రూ.84,900గానూ ఉంది.