త్వరలో iPhone 14 సిరీస్ వచ్చేస్తోంది.. మరి ఇప్పుడు iPhone 13 మొబైళ్లు కొనవచ్చా?

ఐఫోన్ 14 సిరీస్‌ ( iPhone 14 Series ) ను ఈ ఏడాది సెప్టెంబర్‌లో లాంచ్ చేసేందుకు సిద్ధమైంది యాపిల్ (Apple). సెప్టెంబర్ 13వ తేదీనే ఈ కొత్త సిరీస్‌ను తీసుకొస్తుందని తెలుస్తోంది. సాధారణంగా యాపిల్ ప్రతీ సంవత్సరం సెప్టెంబర్ నెలలోనే కొత్త ఐఫోన్‌లను విడుదల చేస్తుంది. అయితే కరోనా ప్రభావం వల్ల ఆలస్యమవడంతో 2020లో అక్టోబర్‌లో ఐఫోన్ 12 సిరీస్‌ను లాంచ్ చేసింది. 2021లో సెప్టెంబర్‌లోనే ఐఫోన్ 13 ( iPhone 13 ) మొబైళ్లను తీసుకొచొచ్చింది. ఈ ఏడాది పరిస్థితులు అంతా బాగానే ఉండడంతో సెప్టెంబర్‌లో ఐఫోన్ 14 సిరీస్ రావడం ఖాయంగా ఉంది. చాలా అప్‍గ్రేడ్‌లతో ఈ కొత్త మొబైళ్లు వస్తాయని అంచనాలు ఉన్నాయి. ఐఫోన్ సిరీస్‌లో ఐఫోన్ 14, ఐఫోన్ 14 ప్రో, ఐఫోన్ 14 ప్లస్, ఐఫోన్ 14 మ్యాక్స్ ప్రో లాంచ్ అవుతాయని తెలుస్తోంది. దాదాపు మరో 40 రోజుల్లో కొత్త సిరీస్ వస్తున్న నేపథ్యంలో ఇప్పుడు ఐఫోన్ 13 సిరీస్ ( iPhone 13 series ) మొబైళ్లు కొనొచ్చా.. లేకపోతే కొన్ని రోజులు వేచిచూడాలా.. అనే సందేహాన్ని కొందరు వ్యక్తం చేస్తున్నారు. వారి కోసమే ఈ సమాచారం..

iPhone 13 సిరీస్ లాంచ్ అయి ఇప్పటికి సంవత్సరం అవుతోంది. అయితే ఇప్పటికీ ధర కాస్త ఖరీదుగానే ఉన్నాయి. లాంచ్ ధర కంటే కేవలం సుమారు 10 శాతం కంటే తక్కువ డిస్కౌంట్‌తోనే లభిస్తున్నాయి. అయితే ఐఫోన్ 14 సిరీస్ విడుదలయ్యాక.. ఐఫోన్ 13 మొబైల్స్ ధర తగ్గే అవకాశాలు అధికంగా ఉన్నాయి. గతంలోనూ కొత్త ఐఫోన్ సిరీస్ లాంచ్ అయిన కొంత కాలానికే.. గత సిరీస్ మొబైళ్ల ధరలు అధికారికంగానే బాగా తగ్గాయి. ముఖ్యంగా భారత్‌లో ఇలా ప్రతీ ఏడాది జరుగుతోంది. అందుకే ఒకవేళ మీరు ఐఫోన్ 13 సిరీస్ మొబైల్‌ కొనాలనుకుంటే.. మరో నెల ఆగితే బాగుంటుంది.

అలాగే, భారత్‌లో అక్టోబర్‌లోనే పండుగ సీజన్ మొదలవుతుంది. ఈ సందర్భంగా ఈ-కామర్స్ సైట్స్‌లో సేల్స్ జరుగుతాయి. సేల్స్‌లో ఐఫోన్ 13 సిరీస్‌ ధరపై భారీ తగ్గింపుతో మంచి డీల్స్ అందుబాటులోకి వచ్చే అవకాశం ఉంది. అలాగే బ్యాంక్ కార్డ్ ఆఫర్లు కూడా ఉంటాయి. దీంతో మంచి ధరకే ఐఫోన్ 13 సిరీస్‌ మొబైల్‌ను మీరు దక్కించుకునే అవకాశం ఉంటుంది. అందుకే ఐఫోన్ 13 సిరీస్‌లో మొబైల్‌ను కొనాలంటే.. 14 సిరీస్ విడుదల వరకు వేచిఉండడం బెస్ట్.