ఫోన్ పే, గూగుల్ పే, పేటీఎం యాప్స్ ద్వారా ATMల నుంచి డబ్బు ఎలా విత్‌డ్రా చేసుకోవాలంటే..?

ఏటీఎం మెషీన్ (ATM machine) నుంచి డబ్బును విత్‌డ్రా చేసుకోవాలంటే డెబిట్ కార్డు ప్రధానమార్గంగా ఉంది. డెబిట్‌కార్డు ద్వారానే ఎక్కువ మంది ప్రజలు తమ అకౌంట్‌లోని డబ్బు తీసుకుంటున్నారు. అయితే ఏటీఎంల ద్వారా నగదు విత్‌డ్రా చేసుకునేందుకు కొత్త విధానం అందుబాటులోకి వస్తోంది. ఫోన్ పే (PhonePe), గూగుల్ పే (GPay), పేటీఎం (Paytm) లాంటి యూపీఐ ప్లాట్‌ఫామ్‌లను (UPI Platforms) ఉపయోగించి కార్డు లేకుండానే నగదు విత్‌డ్రా చేసుకునే సదుపాయం వస్తోంది. ఇందుకుగాను దేశవ్యాప్తంగా ఉన్న ఏటీఎం మెషీన్లను ఎన్‌సీఆర్ కార్పొరేషన్ (NCR Corporation) క్రమంగా అప్‌డేట్ చేస్తోంది. ఇప్పటికే కొన్ని ATMలను అప్‌గ్రేడ్ చేయగా.. మరిన్ని వాటికి త్వరలో ఈ ఫీచర్ రాబోతోంది. ఇది అందుబాటులోకి వస్తే స్మార్ట్‌ఫోన్‌లోని యూపీఐ యాప్స్ ద్వారానే ఏటీఎంల నుంచి నగదు తీసుకోవచ్చు. అంటే డెబిట్, క్రెడిట్ కార్డు లేకుండానే ATM నుంచి డబ్బు విత్‌డ్రా చేసుకోవచ్చన్న మాట.

యూపీఐ యాప్స్ ద్వారా ATMల నుంచి డబ్బు విత్‌డ్రా చేసుకునే సదుపాయం వచ్చాక.. దాన్ని ఎలా ఉపయోగించుకోవాలో చూడండి. ఈ కింది స్టెప్స్ ఫాలో అవండి.
ముందుగా ఈ విధంగా డబ్బు తీసుకోవాలంటే యూపీఐ సర్వీస్‌లకు అప్‌గ్రేడ్ అయిన ఏటీఎం ఉండాలి. మీ స్మార్ట్‌ఫోన్‌లో ఫోన్‌పే, గూగుల్ పే, అమెజాన్‌పే, పేటీఎం లాంటి ఏదైనా యూపీఐ ఆధారిత పేమెంట్స్ యాప్ (UPI Based Payments App) ఉండాలి. ఇంటర్నెట్ కనెక్షన్ కూడా పని చేస్తుండాలి.
ఏటీఎం ద్వారా యూపీఐ యాప్స్‌తో నగదు విత్‌డ్రా చేసుకునే ప్రక్రియ

• ముందుగా ఏటీఎం మెషీన్ వద్దకు వెళ్లాలి. దాంట్లో విత్‌డ్రా క్యాష్ (Withdraw Cash) ఆప్షన్‌ను ఎంచుకోవాలి.
• అప్పుడు ఏటీఎం మెషీన్ స్క్రీన్‌పై UPI ఆప్షన్‌ను సెలెక్ట్ చేసుకోవాలి.
• అనంతరం ATM స్క్రీన్‌పై క్యూఆర్ కోడ్ కనిపిస్తుంది.
• అప్పుడు మీ స్మార్ట్‌ఫోన్‌లోని ఫోన్‍పే, పేటీఎం, గూగుల్ పే లాంటి ఏదైనా యూపీఐ ఆధారిత పేమెంట్‌ యాప్ ఓపెన్ చేసి.. ఆ క్యూఆర్ కోడ్‌ను స్కాన్ చేయాలి.
• కోడ్‌ స్కాన్ పూర్తయ్యాక.. ఎంత మేర విత్‌డ్రా చేసుకోవాలనుకుంటున్నారో ఎంటర్ చేయాలి. (ప్రస్తుతం లిమిట్ రూ.5,000గా ఉంది.)
• ఆ తర్వాత ప్రొసీడ్‌పై క్లిక్ చేసి.. మొబైల్‌లో యూపీఐ పిన్‌ను ఎంటర్ చేయాలి. ఆ తర్వాత డబ్బు విత్‌డ్రా పూర్తవుతుంది.

అంటే యూపీఐ యాప్స్ ద్వారా క్యూఆర్ కోడ్ స్కాన్ చేసి.. చెల్లింపులు చేసినట్టే ATM నుంచి నగదు విత్‌డ్రా చేసుకోవచ్చు. ఈ సదుపాయం అందుబాటులోకి వస్తే డెబిట్ కార్డులను వెంట తీసుకెళ్లాల్సిన అవసరం తప్పుతుంది.

Also Read: వాట్సాప్‌లో చాలా మందికి తెలియని ఫీచర్లు ! బోల్డ్ టెక్స్ట్, స్టార్ మెసేజ్‌లు సహా మరిన్ని..
Also Read: ల్యాప్‌టాప్‌ చార్జింగ్ త్వరగా అయిపోతోందా.. ఈ టిప్స్ పాటిస్తే బ్యాటరీ లైఫ్ పెరుగుతుంది
Also Read: కాల్ రికార్డింగ్ యాప్స్‌పై బ్యాన్ అమలులోకి వచ్చింది - మరి మీ ఫోన్‌లో Call Recording పరిస్థితేంటి..?