రూ.3,499కే బ్లూటూత్ కాలింగ్ స్మార్ట్‌వాచ్ లాంచ్.. ఇన్‌బుల్ట్ గేమ్స్, మరిన్ని స్పెషల్ ఫీచర్లు కూడా - Noise ColorFit Icon Buzz Smartwatch

Noise ColorFit Icon Buzz Smartwatch : బ్లూటూత్ కాలింగ్ సపోర్టు ఫీచర్‌ ఉన్న స్మార్ట్‌వాచ్‌ను నాయిస్ తొలిసారి లాంచ్ చేసింది. దీంతోపాటు మరిన్ని ఆకర్షణీయమైన ఫీచర్లతో నాయిస్ కలర్‌ఫిట్ ఐకాన్ బజ్ (Noise ColorFit Icon Buzz) స్మార్ట్‌వాచ్‌ను బడ్జెట్ రేంజ్‌లో తీసుకొచ్చింది. హార్ట్‌రేట్ మానిటర్, బ్లడ్ ఆక్సిజన్ ట్రాకర్‌తో పాటు మరికొన్ని హెల్త్ ఫీచర్లు ఉన్నాయి. అలాగే విభిన్న స్పోర్ట్స్ మోడ్స్, వాయిస్ అసిస్టెంట్ సపోర్టు సైతం ఉంది. బ్లూటూత్ కాలింగ్ ఫీచర్ (Bluetooth calling Smartwatch) ఉండడంతో స్మార్ట్‌ఫోన్‌కు వచ్చే కాల్స్‌ను వాచ్ ద్వారానే మాట్లాడవచ్చు, కాల్స్ చేయవచ్చు. ఈ స్మార్ట్‌వాచ్ స్పెసిఫికేషన్లు, ధర వివరాలు చూడండి.

నాయిస్ కలర్ ఫిట్ ఐకాన్ బజ్ స్మార్ట్ వాచ్ ధర, సేల్
Noise ColorFit Icon Buzz ధరను రూ.4,999గా నిర్ణయించింది నాయిస్. అయితే లాంచ్ సందర్భంగా ప్రత్యేక ఆఫర్ ప్రకటించింది. రూ.3,499కే ఈ వాచ్‌ను అమ్మకానికి తెచ్చింది. ఇది పరిమితకాల ఆఫర్‌గా ఉండనుంది. జెట్ బ్లాక్, మిడ్‌నైట్ గోల్డ్, ఓలివ్ గోల్డ్, సిల్వర్ గ్రే కలర్ ఆప్షన్లలో ఈ వాచ్ లభ్యమవుతోంది. ప్రముఖ ఈకామర్స్ సైట్లు అమెజాన్, ఫ్లిప్‌కార్ట్‌తో పాటు నాయిస్ అధికారిక వెబ్‌సైట్‌లోనూ ఈ స్మార్ట్‌వాచ్‌ను కొనుగోలు చేయవచ్చు.

నాయిస్ కలర్ ఫిట్ ఐకాన్ బజ్ స్మార్ట్ వాచ్ స్పెసిఫికేషన్లు, ఫీచర్లు
1.69 ఇంచుల టీఎఫ్‌టీ ఎల్‌సీడీ డిస్‌ప్లేతో Noise ColorFit Icon Buzz స్మార్ట్‌వాచ్ వస్తోంది. 100 వరకు వాచ్ ఫేసెస్ అందుబాటులో ఉంటాయి. అలాగే వాయిస్ అసిస్టెంట్లు గూగుల్ అసిస్టెంట్, సిరి కూడా సపోర్టు చేస్తుంది ఈ వాచ్. బ్లూటూత్ కాలింగ్ ఫీచర్ దీనికి ప్రధాన ఆకర్షణ. బ్లూటూత్ ద్వారా కనెక్ట్ అయిన ఫోన్‌కు వచ్చే కాల్స్ మాట్లాడడమే కాకుండా రీసెంట్ కాల్స్, కాంటాక్టులను వాచ్‌లోనే చూడవచ్చు.

నిద్రను విశ్లేషించే స్లీప్ మానిటర్, బ్లడ్ ఆక్సిజన్ సాచురేషన్ (SpO2) మానిటరింగ్, నిరంతర హార్ట్‌రేట్ మానిటరింగ్ హెల్త్ ఫీచర్లు ఈ స్మార్ట్‌వాచ్‌లో ఉన్నాయి. అలాగే రన్నింగ్, వాకింగ్, సైక్లింగ్, యోగా లాంటి తొమ్మిది స్పోర్ట్స్ మోడ్స్‌ను నాయిస్ ఈ వాచ్‌లో అందిస్తోంది.
కొన్ని మినీ గేమ్స్ Noise ColorFit Icon Buzz వాచ్‌లో ఇన్‌బుల్ట్‌గా ఉండడం మరో ప్రత్యేకత. నాయిస్ విడుదల చేసిన టీజర్‌ ద్వారా ఈ వాచ్‌లో ఫ్లాపీ బర్డ్ గేమ్ ఉన్నట్టు స్పష్టమవుతోంది.

ఇక ఆండ్రాయిడ్, ఐఓఎస్ స్మార్ట్‌ఫోన్‌లను కనెక్ట్ చేసుకునేందుకు బ్లూటూత్ 5.1 కనెక్టివిటీతో ఈ వాచ్ వస్తోంది. అలాగే వాటర్, డస్ట్ రెసిస్టెంట్ కోసం ఐపీ67 రేటింగ్ ఉంటుంది. 230ఎంఏహెచ్ బ్యాటరీతో వస్తున్న ఈ వాచ్‌ను ఫుల్ చార్జ్ చేస్తే ఏడు రోజుల వరకు వినియోగించుకోవచ్చు. రెండు గంటల్లో Noise ColorFit Icon Buzz Smartwatch బ్యాటరీ ఫుల్ చార్జ్ అవుతుంది.