Poco M5 : 50 MP కెమెరా, 128జీబీ వరకు స్టోరేజ్‌తో పోకో నయా మొబైల్‌ వచ్చేసింది.. బడ్జెట్ రేంజ్‌లోనే..

Poco M5 Price, Specifications : షావోమీ సబ్ బ్రాండ్ పోకో (Poco).. ఎం సిరీస్‌లో మరో స్మార్ట్‌ఫోన్‌ను లాంచ్ చేసింది. బడ్జెట్ రేంజ్‌లో ఈ 4జీ ఫోన్‌ను తీసుకొచ్చింది. పోకో ఎం5 (Poco M5) ఫోన్ భారత్‌లో లాంచ్ అయింది. మీడియాటెక్ హీలియో జీ99 ప్రాసెసర్‌ ఈ మొబైల్‌లో ఉంది. బడ్జెట్ రేంజ్‌లో మంచి పర్ఫార్మెన్స్ అంటూ పోకో హైలైట్ చేస్తోంది. 90Hz రిఫ్రెష్ రేట్ ఉన్న ఫుల్ హెచ్‌డీ+ డిస్‌ప్లే, 50 మెగాపిక్సెల్ ప్రధాన కెమెరాతో Poco M5 వస్తోంది. 5000mAh బ్యాటరీ, ఫాస్ట్ చార్జింగ్ సపోర్ట్‌ను ఈ పోకో నయా 4జీ స్మార్ట్‌ఫోన్‌ కలిగి ఉంది.

Poco M5 ధర, సేల్‌
4GB ర్యామ్ + 64GB స్టోరేజ్ ఉన్న పోకో ఎం5 బేస్ మోడల్ ధర రూ.12,499గా ఉంది. 6GB ర్యామ్, 128GB స్టోరేజ్ ఉన్న టాప్‌ మోడల్ రూ.14,499ధరకు లాంచ్ అయింది. ఐసీ బ్లూ, పోకో ఎల్లో, పవర్ బ్లాక్ కలర్ ఆప్షన్‌లలో ఈ ఫోన్‌ లభిస్తుంది. ఈనెల 13వ తేదీన ఈ-కామర్స్ సైట్ ఫ్లిప్‌కార్ట్‌లో ఈ ఫోన్‌ సేల్‌కు వస్తుంది.
Poco M5 ఆఫర్లు
ఐసీఐసీఐ బ్యాంక్, యాక్సిస్ బ్యాంక్ కార్డ్‌లతో పోకో ఎం5 మొబైల్‌ను కొంటే రూ.1,500 వరకు డిస్కౌంట్ పొందవచ్చు. అంటే బేస్ మోడల్‌ను రూ.10,999కే దక్కించుకోవచ్చు. అలాగే సంవత్సరం పాటు డిస్నీ+ హాట్‌స్టార్ మొబైల్‌ సబ్‌స్కిప్షన్ ఉచితంగా లభిస్తుంది.

Poco M5 స్పెసిఫికేషన్లు
6.58 ఇంచుల ఫుల్ హెచ్‌డీ+ IPS LCD డిస్‌ప్లేతో పోకో ఎం5 వస్తోంది. 90Hz వరకు రిఫ్రెష్ రేట్‌, 240Hz టచ్ సాంప్లింగ్ రేట్, కార్నింగ్ గొరిల్లా గ్లాస్ 3 ప్రొటెక్షన్ ఉంటుంది. ఆక్టాకోర్ మీడియాటెక్ హీలియో జీ99 ప్రాసెసర్‌పై ఈ ఫోన్‌ రన్ అవుతుంది. గరిష్ఠంగా 6జీబీ ర్యామ్, 128జీబీ స్టోరేజ్ ఉంటుంది. మొమరీ కార్డ్ స్లాట్ ప్రత్యేకంగా ఉంటుంది. ఆండ్రాయిడ్‌ 12 బేస్ట్ ఎంఐయూఐ 13 ఓఎస్‌తో ఈ ఫోన్‌ అందుబాటులోకి వస్తోంది.

Poco M5 ఫోన్‌ వెనుక మూడు కెమెరాలు ఉన్నాయి. 50 మెగాపిక్సెల్ ప్రైమరీ, 2 మెగాపిక్సెల్ మాక్రో, 2 మెగాపిక్సెల్ డెప్త్ కెమెరాలు ఉన్నాయి. సెల్ఫీలు, వీడియో కాల్స్ కోసం 8 మెగాపిక్సెల్ ఫ్రంట్ కెమెరాను పోకో ఇచ్చింది.

Poco M5 ఫోన్‌లో 5000mAh బ్యాటరీ ఉంటుంది. 18వాట్ల ఫాస్ట్ చార్జింగ్‌కు సపోర్ట్ చేస్తుంది. డ్యుయల్ సిమ్ 4జీ ఎల్‌టీఈ, వైఫై, బ్లూటూత్, జీపీఎస్, ఇన్‌ఫ్రారెడ్ (IR) బ్లాస్టర్, 3.5mm హెడ్‌ఫోన్ జాక్, యూఎస్‌బీ టైప్-సీ పోర్ట్ కనెక్టివిటీ ఆప్షన్‌లను ఈ ఫోన్‌ కలిగి ఉంది.