వాట్సాప్‌లో ఈ ఫీచర్ అందరికీ వచ్చేస్తోంది - టెలిగ్రామ్‌లోని ఫీచర్ లాంటిదే - అదేంటో, ఎలా వాడాలో చూడండి

WhatsApp Emoji Reaction Rolling out : పాపులర్ మెసేజింగ్ యాప్‌ వాట్సాప్‌కు కొత్త ఫీచర్లు వస్తూనే ఉన్నాయి. ఇటీవల వరుసగా కొత్త సదుపాయాలు అందుబాటులోకి వస్తున్నాయి. యాప్‌ వాడకాన్ని మరింత సులభతరం చేసేలా వివిధ విభాగాల్లో ఫీచర్లను వాట్సాప్‌ ప్రవేశపెడుతోంది. ఈ క్రమంలో ఎమోజీ రియాక్షన్ ఫీచర్ తీసుకొస్తున్నట్టు గత నెల ప్రకటించింది. ఇప్పుడు యూజర్లందరికీ అందుబాటులోకి తీసుకొస్తోంది. ఇప్పటికే టెలిగ్రామ్, యాపిల్ ఐమెసేజ్, స్లాక్ లాంటి వాటిలో ఉన్న ఈ ఎమోజీ రియాక్షన్‌ వాట్సాప్‌కు కూడా వస్తోంది. వారంలోగా యూజర్లందరికీ వచ్చే అవకాశం ఉంది. అసలు ఎమోజీ రియాక్షన్ ఎలా ఉంటుంది.. ఎలా వాడాలో ఇక్కడ తెలుసుకోండి. అలాగే మరో రెండు కొత్త సదుపాయాలను కూడా వాట్సాప్‌ త్వరలోనే తెలుస్తోంది. అవేంటో కూడా చూడండి.

అప్‌డేట్‌ ద్వారా వాట్సాప్‌కు ఎమోజీ రియాక్షన్ ఫీచర్ యాడ్ అవుతుంది. లేటెస్ట్ వెర్షన్‌ వాట్సాప్‌లో ఈ సదుపాయం వచ్చినట్టు మెటా సీఈవో మార్క్ జుకర్‌బర్గ్ వెల్లడించారు. ఇన్‌స్టాగ్రామ్ స్టోరీ ద్వారా ఈ విషయాన్ని టీజ్ చేశారు. త్వరలోనే యూజర్లందరికీ ఈ ఫీచర్ అందుబాటులోకి వస్తుంది.

ఈ ఫీచర్ ద్వారా గ్రూప్ లేదా వ్యక్తిగత చాట్‌లో మెసేజ్‌లకు ఎమోజీతో రియాక్షన్ ఇవ్వొచ్చు. ప్రత్యేతంగా ఆ మెసేజ్‌కు మీ ఫీలింగ్స్, ఎమోషన్స్‌ను ఎమోజీల ద్వారా తెలియజేయవచ్చు. టెక్ట్స్ అవసరం లేకుండా ఆ మేసెజ్‌కు మీ భావాన్ని తెలియజేయవచ్చు.

ఎమోజీ రియాక్షన్‌ను ఎలా వాడాలంటే

• ఏదైనా కాంటాక్ట్ చాట్ లేదా గ్రూప్ చాట్‌లోకి వెళ్లండి.
• మీరు రియాక్ట్ అవ్వాలనుకుంటున్న మెసేజ్‌పై ట్యాప్ చేసి, అలాగే హోల్డ్ చేసి పట్టుకోండి.
• అప్పుడు మీకు ఎమోజీల ఆప్షన్లు కనిపిస్తాయి. అందులోని ఏదైనా ఎమోజీని ఎంచుకోవచ్చు. ఇలా ప్రత్యేకంగా ఆ మెసేజ్‌కు మీ భావాన్ని ఎమోజీ రూపంలో తెలియజేయవచ్చు.
• వాట్సాప్‌లో ఏ మెసేజ్‌కైనా ఎమోజీలతో రియాక్ట్ అవ్వొచ్చు. ఒకవేళ మీ మెసేజ్‌కు ఎవరైనా రియాక్ట్ అయితే మీకు పుష్‌ నోటిఫికేషన్ వస్తుంది.

ప్రస్తుతం ఈ రియాక్షన్ ఫీచర్‌లో ఆరు ఎమోజీలు ఉన్నాయి. లైక్, లవ్ (రెడ్ హార్ట్), నవ్వు, సర్‌ప్రైజ్, సాడ్, థ్యాంక్స్ ఎమోజీలు ఉన్నాయి. త్వరలో మరిన్ని ఎక్స్‌ప్రెషన్స్ కూడా యాడ్ చేయనున్నట్టు వాట్సాప్‌ పేర్కొంది.

గ్రూపులో 512 మంది.. ప్రస్తుతం ఓ వాట్సాప్‌ గ్రూప్‌లో గరిష్ఠంగా 256 మంది సభ్యులు మాత్రమే ఉండే అవకాశం ఉంది. అయితే ఈ సంఖ్యను 512కు పెంచేందుకు వాట్సాప్‌ సిద్ధమైంది. త్వరలోనే గ్రూప్ మెంబర్స్ లిమిట్‌ను 512కు పెంచనుంది. మరోవైపు ప్రస్తుతం 100MB ఫైల్ వరకు మాత్రమే షేర్ చేసే అవకాశం ఉండగా.. 2GB వరకు ఫైల్స్‌ను షేర్ చేసుకునే సదుపాయాన్ని కల్పించనుంది.