WhatsApp Down: పరేషాన్ చేసిన వాట్సాప్.. చాలాసేపు అంతరాయం

WhatsApp Down : పాపులర్ మెసేజింగ్ యాప్ వాట్సాప్‌ (WhatsApp) సేవలకు తీవ్ర అంతరాయం ఏర్పడింది. భారత్‌లో సుమారు మధ్యాహ్నం 12.07 గంటలకు ఈ సమస్య మొదలైంది. లక్షలాది మంది యూజర్లు ఈ విషయంపై ఫిర్యాదులు చేశారు. చాలా సేపు వాట్సాప్‌లో మెసేజ్‌లు సెండ్ అవలేదు, రిసీవ్ కాలేదు. భారత్‌తో పాటు చాలా దేశాల్లో వాట్సాప్ డౌన్ అయింది. మొత్తంగా వాట్సాప్‌ సర్వీస్‌లన్నీ స్తంభించిపోయాయి (WhatsApp Outage). వాట్సాప్ ఇంత సేపు నిలిచిపోవడం ఇదే తొలిసారి. ఔటేజ్ అయిన ప్రతీసారి ఎక్కువ శాతం సుమారు 10 నిమిషాల్లోనే సమస్య సద్దుమణిగేది. అయితే ఈసారి సుదీర్ఘంగా కొనసాగింది. దాదాపు గంటకు పైగా వాట్సాప్ సర్వీస్‌లు నిలిచిపోవడంతో అంతటా గందరగోళం ఏర్పడింది. అయితే ఎట్టకేలకు క్రమంగా ఈ సమస్యను వాట్సాప్ పరిష్కరిస్తోంది.

వాట్సాప్‌ పర్సనల్ చాట్స్‌తో పాటు గ్రూప్స్‌కు కూడా సమస్య తలెత్తింది. చాలాసేపు ఎలాంటి మెసేజ్‌లు సెండ్ అవలేదు. అయితే ఎక్కువగా పర్సనల్ చాట్స్‌లోనే ఈ ఔటేజ్ తలెత్తింది. ఔటేజ్ డిటెక్షన్ వెబ్‌సైట్‌ డౌన్‌డిటెక్టర్ (DownDetector) కూడా ఈ విషయాన్ని వెల్లడించింది. ఇండియాలో లక్షలాది మంది యూజర్లు ఈ విషయాన్ని రిపోర్ట్ చేసినట్టు పేర్కొంది. దాదాపు చాలా నగరాల్లో ఈ వాట్సాప్‌ సర్వీస్‌లు డౌన్ అయ్యాయి.

ఈ విషయంపై వాట్సాప్ పేరెంట్ కంపెనీ మెటా స్పందించింది. "మెసేజ్‌లు సెండ్ చేసేందుకు కొందరు యూజర్లు ఇబ్బందులు ఎదుర్కొంటున్నట్టు గుర్తించాం. మళ్లీ అందరికీ వాట్సాప్‌ను రిస్టోర్ చేసేందుకు పని చేస్తున్నాం. వీలైనంత త్వరగా సమస్యను పరిష్కరించేందుకు కృషి చేస్తున్నాం" అని మెటా ప్రతినిధి వెల్లడించారు. అయితే సేవలు నిలిచిపోయిన దాదాపు గంట తర్వాత పునరుద్ధరణను వాట్సాప్ మొదలుపెట్టింది. క్రమంగా యూజర్లకు సమస్య పరిష్కారమైంది. ఇప్పటికే చాలా మంది యూజర్లకు వాట్సాప్ సర్వీస్‌లు మళ్లీ వస్తున్నాయి. మెసేజ్‌లు సెండ్ అవుతున్నాయి.

ఇప్పటికే ట్విట్టర్‌తో పాటు ఇతర సోషల్ మీడియా ప్లాట్‌ఫామ్‌లలో #WhatsAppDown హ్యాష్‌ట్యాగ్ ట్రెండ్ అవుతోంది. మరోవైపు వాట్సాప్ ఇంతసేపు నిలిచిపోవడం పట్ల కొందరు ఆందోళన వ్యక్తం చేస్తున్నారు. సైబర్ అటాక్ జరిగిందా అని కూడా సోషల్ మీడియా వేదికగా కొందరు అనుమానాలు వ్యక్తం చేశారు. అయితే వాట్సాప్ సేవలను మెటా క్రమంగా పునరుద్ధరిస్తోంది.