Xiaomi Robot : షావోమీ అద్భుత సృష్టి.. ఎమోషన్స్‌ను గుర్తించే హ్యూమనాయిడ్ రోబో : పూర్తి వివరాలు

చైనీస్ కంపెనీ షావోమీ (Xiaomi) సరికొత్త హ్యూమనాయిడ్ రోబాట్‌ను ఆవిష్కరించింది. షావోమీ ఎంఐ మిక్స్ ఫోల్డ్ 2 లైవ్ ఈవెంట్‌లో ఈ రోబోను ప్రపంచానికి పరిచయం చేసింది. ఈ రోబోకు సైబర్‌వన్ (CyberOne) అని నామకరణం చేసింది షావోమీ. పూర్తి వివరాలను వెల్లడించింది. మనుషుల మాటలను నిశితంగా ఈ హ్యూమనాయిడ్ రోబాట్ వినగలదు. వాటిని బట్టి మనుషుల ఎమోషన్స్‌ను కూడా గుర్తించగలదు. ఈ సైబర్‌వన్ హ్యూమనాయిడ్ రోబాట్ (Xiaomi CyberOne Humanoid Robot) గురించి పూర్తి వివరాలు ఇవే.

షావోమీ సైబర్‌వన్ హ్యూమనాయిడ్ రోబాట్ 177 సెంటీమీటర్ల ఎత్తు ఉంది. మొత్తంగా 52 కేజీల బరువు ఉంటుంది. 85 రకాల ఎన్విరాన్‌మెంటల్ శబ్దాలు, మనుషుల 45 రకాల ఎమోషన్స్‌ను ఈ రోబో గుర్తించగలదు. ఈవెంట్‌లో.. షావోమీ చీఫ్ ఎగ్జిక్యూటివ్ ఆఫీసర్‌ లీ జున్‌కు స్టేజ్‌పై ఈ సైబర్‌వన్ రోబో బొకేను అందించింది. కొన్ని మూవ్‌మెంట్స్‌ను ప్రదర్శించింది. “సైబర్‌వన్… ఏఐ, మెకానికల్ కేపబులిటీస్ అన్నీ షావోమీ రొబోటిక్స్ ల్యాబ్ స్వయంగా డెవలప్ చేసింది. పరిశోధన, అభివృద్ధిపై మేం భారీగా పెట్టుబడులు పెడుతున్నాం. సాఫ్ట్‌వేర్, హార్డ్‌వేర్, అల్గారిథమ్స్ ఇన్నోవేషన్స్‌పై అధిక దృష్టి సారించాం” అని లీ జున్ పేర్కొన్నారు.

CyberOne Humanoid Robot.. కాళ్లు, చేతులతో పాటు డైప్‌ డీల్ మోషన్ టెక్నాలజీని కలిగి ఉంది. గరిష్ఠంగా 300నానో మీటర్స్ టార్క్యు వరకు చేరుకుంటుంది. ఫేషియల్ ఎక్స్‌ప్రెషన్స్‌ను చూపించేందుకు OLED మాడ్యూల్ డిస్‌ప్లేను కలిగి ఉంది. ఈ రోబో ప్రపంచాన్ని 3డీలో చూడగలదు. మొత్తంగా 177cm ఎత్తు ఉంటుంది. ఆర్మ్ స్పాన్ 168cmగా ఉంది. సైబర్‌వన్ రోబాట్ మోషన్‌లో 21 డిగ్రీల ఫ్రీడమ్‌కు సపోర్ట్ చేస్తుందని, రియల్‌టైమ్ రెస్పాన్స్ 0.5మిల్లీ సెకన్లుగా ఉంటుందని షావోమీ వెల్లడించింది. ఈ రోబో ఒక్క చేతత్తో 1.5కేజీల బరువు వరకు మోయగలదని పేర్కొంది.
Also Read: Xiaomi Mix Fold 2 : సామ్‌సంగ్‌‌కు పోటీగా షావోమీ కొత్త ఫోల్డబుల్ ఫోన్‌.. పవర్‌ఫుల్‌ స్పెసిఫికేషన్లతో.. ధర ఎంతంటే?
ఎంఐ సెన్స్ సిస్టమ్స్, ఏఐ అల్గారిథమ్స్‌ను ఈ సైబర్‌వన్ హ్యూమనాయిడ్ రోబాట్ (CyberOne Robot) కలిగి ఉంది. దీంతో మనుషుల కదలికలను సులువుగా గుర్తిస్తుంది. 85 రకాల పరిసరాల శబ్దాలను, మనుషుల భావాలను అర్థం చేసుకోగలుగుతుంది. కాగాసైబర్‌వన్ ఇంకా అభివృద్ధి దశలోనే ఉంది. ఫైనల్‌గా లాంచ్ అయ్యే ముందే మరిన్ని కొత్త ఫీచర్లు, అప్‍‌డేట్లు యాడ్ అవుతాయి. ఈ విషయాన్ని షావోమీ వెల్లడించింది.

షావోమీ రొబోటిక్స్ ల్యాబ్ నుంచి వచ్చిన రెండో ప్రొడక్ట్ ఈ CyberOne Humanoid Robot. ఈఏడాది ప్రారంభంలో సైబర్‌డాగ్‌ను షావోమీ ఆవిష్కరించింది. టచ్ సెన్సార్, కెమెరాలు, జీపీఎస్ మాడ్యూల్స్ లాంటి 11 హై ప్రెసెషన్స్ సెన్సార్‌లతో సైబర్‌డాగ్‌ను లాంచ్ చేసింది. వాయిస్ కమాండ్స్‌ను ఇది అనుకరించగలదు. రిమోట్, స్మార్ట్‌ఫోన్‌ యాప్‌తో కూడా ఈ షావోమీ సైబర్‌డాన్‌ను కంట్రోల్ చేయవచ్చు.