YouTube: యూట్యూబ్‌లో సూపర్ ఫీచర్.. మీ టైమ్ సేవ్ అయ్యేలా..

యూట్యూబ్‌ ( YouTube ) లో ఎక్కువ నిడివి ఉన్న వీడియోలు చూడడం ఒక్కోసారి విసుగ్గా అనిపిస్తుంది. ఆ వీడియోలో ఆసక్తికర అంశం ఎక్కడ ఉందో గుర్తించడం కష్టం. అందుకే కావాల్సిన విషయాన్ని తెలుసుకునేందుకు వీడియో మొత్తం చూడాల్సిన పరిస్థితి ఉంటుంది. ఇందుకు ఎక్కువ సమయం వెచ్చించాలి. అయితే దీనికి యూట్యూబ్ పరిష్కారాన్ని తీసుకొచ్చింది. వీడియోల్లో ముఖ్యమైన అంశం ఎక్కడ ఉందో గుర్తించేలా దీన్ని తీసుకొచ్చింది. ఇంత వరకు ప్రీమియమ్ ( YouTube Premium ) సబ్‌స్క్రైబర్లకు మాత్రమే అందుబాటులో ఉన్న ఈ ఫీచర్‌ను యూజర్లందరికీ ఇస్తున్నట్టు యూట్యూబ్ ప్రకటించింది. మొబైల్‌తో పాటు డెస్క్‌టాప్ వెర్షన్‌లోనూ ఈ కొత్త ఫీచర్ యాడ్ కానుంది. ఏంటీ ఫీచర్.. ఎలా పని చేస్తుందో చూడండి. (YouTube New Feature)

వీడియోలో ఎక్కువ మంది ప్లే చేసిన పార్ట్‌ను యూట్యూబ్ ప్రత్యేకంగా చూపించనుంది. అంటే ఆ వీడియోలోని ఏ భాగాన్ని ఎక్కువ మంది ఎక్కువగా చూశారో యూట్యూబ్ హైలైట్ చేయనుంది. దీని కోసం యూట్యూబ్ ప్లేయర్‌లో ఓ గ్రాఫ్ (YouTube Graph) కనిపిస్తుంది. గ్రాఫ్ హైగా ఉన్న భాగంలోనే ఈ వీడియోకు సంబంధించిన ముఖ్యమైన అంశం ఉండే అవకాశం అధికంగా ఉంటుంది. దీంతో వీడియోలోని బోరింగ్ పార్ట్‌ను చూడకుండా.. ఆసక్తికర అంశం ఉన్న చోటికి సులువుగా వెళ్లవచ్చు.

వీడియోలోని ప్రోగ్రెస్ బార్‌ (YouTube Progress bar) లో ఈ గ్రాఫ్‌ను యూట్యూబ్ ప్రదర్శించనుంది. దీని ద్వారా వీడియోలో ఏ పార్ట్‌ను యూజర్లు ఎక్కువగా చూశారో అర్థమవుతుంది. "ఒకవేళ గ్రాఫ్ హైగా ఉంటే వీడియోలోని ఆ పార్ట్‌ ఎక్కువగా ప్లే అయిందని అర్థం. ఆ మూమెంట్స్‌ను మీ సులువుగా గుర్తించవచ్చు" అని యూట్యూబ్ పేర్కొంది.

మరిన్ని ఫీచర్లు
సింగిల్ లూప్ వీడియో ఫీచర్‌ ( YouTube Single loop Video Feature ) ను కూడా యూట్యూబ్ యాడ్ చేస్తోంది. దీని వల్ల అదే వీడియో మళ్లీ మళ్లీ ప్లే అవుతూనే ఉంటుంది. ఒకే వీడియోను వరుసగా ఎక్కువ సార్లు చూడాలనుకుంటే ఈ ఫీచర్‌ను వినియోగించుకోవచ్చు. అలాగే వీడియో చాప్టర్స్ ఫీచర్‌ను ఆండ్రాయిడ్ టీవీ ప్లాట్‌ఫామ్‌కు కూడా యూట్యూబ్ తీసుకురానుంది. వీడియోను సబ్ సెక్షన్‌గా చూపించే ఈ ఫీచర్ ఇప్పటికే మొబైల్ వెర్షన్‌లలో ఉంది. దీని ద్వారా మరోసారి ఆ పోర్షన్‌ను చూడాలంటే సులభంగా వెనక్కి వెళ్లవచ్చు. ఆ పార్ట్‌ను ఎంచుకోవచ్చు. ఇంకా ప్రీమియమ్ సబ్‌స్క్రైబర్ల కోసం ఎక్స్‌పెరెమెంట్ ఫీచర్లను తీసుకొస్తున్నట్టు యూట్యూబ్ పేర్కొంది.