YouTube New Feature : యూట్యూబ్‌లో త్వరలో అదిరిపోయే ఫీచర్ - వీడియో ఎక్కడ నచ్చితే అక్కడ రియాక్షన్

ప్రపంచవ్యాప్తంగా అత్యంత పాపులర్ వీడియో ప్లాట్‌ఫామ్‌ యూట్యూబ్ (YouTube). ప్రతీరోజు కోట్లాది మంది దీన్ని వినియోగిస్తుంటారు. విభిన్నమైన వీడియోలను చూస్తుంటారు. చాలా మంది వీడియోలను లైక్ లేదా అన్‌లైక్ చేస్తుంటారు. అయితే కొందరికి వీడియోలోని కొంత భాగమే నచ్చుతుంది. కానీ ఆ కొంత భాగానికి, ఆ కచ్చితమైన టైమ్‌కు రియాక్షన్ ఇవ్వలేరు. వీడియో మొత్తాన్ని లైక్ లేదా డిస్‌ లైక్ చేయగలరు. అయితే దీనికి పరిష్కారంగా YouTube సరికొత్త ఫీచర్ తెచ్చేందుకు సిద్ధమైంది. మొబైల్‌ యాప్స్‌కు టైమ్డ్ రియాక్షన్ (Timed Reaction) ఫీచర్‌ను తీసుకురానున్నట్టు ప్రకటించింది. వీడియోలోని ఏ టైమ్‌లోనైనా కంటెంట్ నచ్చితే.. అదే సమయానికి రియాక్షన్ పంపవచ్చు. లాఫ్, రెడ్‌హార్ట్‌, క్వశ్చన్ మార్క్ ఇలా మొత్తంగా ఎనిమిది ఎమోజీలను ఈ రియాక్షన్‌లో తీసుకురానుంది. ప్రస్తుతం ఈ ఫీచర్ టెస్టింగ్ జరుగుతోంది.

టైమ్డ్ రియాక్షన్ ఫీచర్‌ ( Timed Reaction Feature ) ను కొత్తగా తీసుకురానున్నట్టు యూట్యూబ్ సపోర్ట్ వెబ్‌సైట్‌ వెల్లడించింది. కొందరు యూజర్లకు ప్రయోగాత్మకంగా ఈ ఫీచర్‌ను యాడ్ చేసి, వారి ఫీడ్‌బ్యాక్ ప్రకారం మార్పులు, చేర్పులు చేస్తామని చెప్పింది. వీడియోలోని కచ్చితమైన సమయంలో ఎనిమిది ఎమోజీల్లో ఒకదానితో యూజర్లు రియాక్ట్ అయ్యే సదుపాయాన్ని ఈ ఫీచర్ కల్పిస్తుంది. వీడియో ప్రోగ్రెస్ బార్‌లో ఆ సమయం వద్ద ఈ రియాక్షన్లు కనిపిస్తుంటాయి. అయితే ఆ రియాక్షన్‌ను ఎవరు పంపారో అన్న విషయం ప్లాట్‌ఫామ్‌లో కనిపించదని YouTube వెల్లడించింది.

ముందుగా కొన్ని చానెళ్లలో ఈ కొత్త టైమ్డ్ రియాక్షన్ ఫీచర్ ప్రయోగించనున్నట్టు యూట్యూబ్ వెల్లడించింది. అయితే ఈ ప్రయోగంలో ఏఏ చానెల్స్ పాల్గొంటున్నాయో చెప్పలేదు. కామెంట్ సెక్షన్‌ను ఓపెన్ చేసి.. రియాక్షన్ ప్యానెల్‌పై ట్యాప్ చేయడం ద్వారా వీడియోలోని కచ్చితమైన సమయంపై యూజర్లు ఎమోజీలతో రియాక్ట్ కావొచ్చు. ప్రస్తుతానికైతే స్మార్ట్‌ఫోన్‌ యాప్స్ కోసం ఈ ఫీచర్‌ను యూట్యూబ్ పరీక్షిస్తోంది. డెస్క్‌టాప్ వెబ్‌సైట్‌ గురించి ప్రస్తావించలేదు.

ప్రస్తుతానికి ఈ టైమ్డ్ రియాక్షన్ ఫీచర్‌లో ఎనిమిది ఎమోజీలు ఉండగా.. యూజర్ల సలహాలు, సూచనలను బట్టి మరిన్ని రియాక్షన్‌లను జత చేస్తామని యూట్యూబ్ వెల్లడించింది. ప్లాట్‌ఫామ్‌లో ఇంటెరాక్షన్స్‌ను మెరుగుపరిచేందుకు తీసుకుంటున్న చర్యల్లో ఈ కొత్త ఫీచర్ ఓ భాగమని చెప్పింది.
మరోవైపు గత సంవత్సరం నవంబర్‌లో వీడియో డిస్‌లైక్‌ల సంఖ్యను యూజర్లకు పబ్లిక్‌గా చూపడం ఆపేసింది యూట్యూబ్. ఇది అప్పట్లో కాస్త వివాదాస్పదమైంది. మరోవైపు వీడియోలోని కచ్చితమైన సమయానికి మాత్రమే కామెంట్ చేసే విధంగా కూడా ఫీచర్ తెచ్చేందుకు యూట్యూబ్ ప్రయత్నిస్తోందని సమాచారం.