Basara IIIT: ఏడో రోజుకు చేసిన బాసర ట్రిపుల్ ఐటీ విద్యార్థుల ఆందోళన.. అర్ధరాత్రి జరిపిన చర్చలు విఫలం

బాసర ట్రిపుల్ ఐటీ (Basara IIIT) విద్యార్థుల ఆందోళన కొనసాగుతోంది. 12 డిమాండ్ల పరిష్కారానికి విద్యార్థులు ఆందోళన చేపడుతుండగా పలు దఫాలుగా అధికారులు, ప్రజా ప్రతినిధులు వారితో చర్చలు జరిపారు. అయినా డిమాండ్ల పరిష్కారానికి స్పష్టమైన హామీ రాకపోవడంతో సోమవారం ఏడో రోజు మెయిన్ గేటు వద్ద విద్యార్థులు తమ ఆందోళనను కొనసాగిస్తున్నారు.

విద్యార్థులతో గత అర్ధరాత్రి కలెక్టర్, అధికారులు జరిపిన చర్చలు విఫలమయ్యాయి. సమస్యల పరిష్కారానికి ప్రభుత్వం సిద్ధంగా ఉందని.. ఆందోళన విరమించాలని కలెక్టర్ సూచించారు. అయితే విద్యార్థులు లిఖిత పూర్వక హామీ కావాలని పట్టుబట్టారు. మంత్రులతో అర్ధరాత్రి హామీ ఇప్పించడం ఇబ్బందికరమని అధికారులు వారికి చెప్పారు. అర్ధరాత్రి చర్చలకు లేని ఇబ్బందులు హామీకి ఏం అడ్డు వస్తుందని విద్యార్థులు ప్రశ్నించారు.

ఈ క్రమంలోనే విద్యార్థులు వినకపోవడంతో కలెక్టర్, అధికారులు వెళ్లిపోయారు. దీంతో విద్యార్థులు యథావిధిగా తమ ఆందోళనను కొనసాగిస్తున్నారు. అంతకుముందు ప్రభుత్వంతో విద్యార్థుల చర్చలు సఫలమంటూ మంత్రి ఇంద్రకరణ్ రెడ్డి అధికారిక ప్రకటన చేయగా.. చర్చలు విఫలమయ్యాయంటూ విద్యార్థులు ఆందోళనను కంటిన్యూ చేస్తున్నట్లు ప్రకటించారు. ఈ క్రమంలోనే ‘మాకు మీ మీద నమ్మకం లేదు..’ అంటూ మంత్రి‌ ఇంద్రకరణ్ రెడ్డి, మంత్రి‌ సబితల కామెంట్లపై విద్యార్థులు ట్వీట్ చేశారు.