ఊరి అవతల సర్పంచ్.. చెట్టు కింద మంచం వేసి

తెలంగాణలో కరోనా కలకలం కొనసాగుతోంది. పట్టణాలు పల్లెలు అని తేడా లేకుండా పాజిటివ్ కేసుల సంఖ్య భారీగా పెరుగుతున్నాయి. దీంతో ప్రజల్లో మరోసారి టెన్షన్ నెలకొంది. దీంతో కొందరు స్వచ్ఛందంగా లాక్ డౌన్ పాటిస్తున్నారు. కరోనా వచ్చిన కొందరు తమకు తాముగా ఊరు వదిలి వేరేగా ఉంటున్నారు. తమ వల్ల గ్రామంలో వేరే వాళ్లు ఎవరూ ఇబ్బంది పడకూడదని ఊరి చివర్లో మంచాలు ఏర్పాటు చేసుకొని పగలంతా అక్కడే ఉంటున్నారు.

ఆదిలాబాద్‌ జిల్లా బేల మండలం సాంగిడి గ్రామంలో ఈ ఘటన చోటు చేసుకుంది. కరోనా రోగులు పగటి పూట ఊరవతల ఉన్న రావి చెట్టు కింద ఉంటున్నారు. మంచాలు ఏర్పాటు చేసుకొని భౌతిక దూరం పాటిస్తూ... కూర్చుంటున్నారు. అయితే రాత్రి కాగానే ఇళ్లలో ఏర్పాటు చేసిన ప్రత్యేక గదుల్లో పడుకుంటున్నారు. కరోనా రోగుల్లో సాంగిడి సర్పంచ్, వార్డు సభ్యులూ సైతం ఉన్నారు. ఊరిలో ఎవరికైనా కరోనా సోకితే ఇలా స్వచ్ఛందంగా జాగ్రత్తలు తీసుకోవడం మంచిదని గ్రామ పెద్దలు సైతం చెబుతున్నారు.