మద్యం మత్తులో.. వాటర్ అనుకొని లిక్కర్‌లో యాసిడ్ కలుపుకొని తాగడంతో..

మద్యం మత్తులో ఓ వ్యక్తి చేసిన పనికి ఏకంగా తన ప్రాణమే పోయింది. మద్యం మత్తులో నీళ్లు అనుకొని యాసిడ్‌ను కలుపుకొని తాగి ఓ వ్యక్తి ప్రాణాలు కోల్పోయాడు. ఈ ఘటన మంచిర్యాల జిల్లాలో చోటు చేసుకుంది. వివరాల్లోకి వెళ్తే.. జిల్లాలోని హాజీపూర్‌ మండలం ముల్కల్ల గ్రామానికి చెందిన ఎర్రవేని మహేశ్ (29) సింగరేణిలో ఉద్యోగం చేస్తున్నారు. అయితే అతడికి మద్యం తీసుకునే అలవాటు ఉంది..

ఈ క్రమంలోనే గత నెల 18న మద్యం తాగుతూ.. ఆ మత్తులో మంచి నీరు అనుకొని యాసిడ్‌ బాటిల్‌లోని యాసిడ్‌ను మద్యంలో కలుపుకుని తాగాడు. దీంతో అప్పటికప్పుడే అపస్మారక స్థితిలోకి వెళ్లిపోయాడు. ఇది గుర్తించిన అతడి కుటుంబ సభ్యులు కరీంనగర్‌లోని ఓ ప్రైవేటు ఆస్పత్రికి తరలించారు. అప్పట్నుంచి చికిత్స పొందుతున్న అతను తాజాగా మృతి చెందాడు. కాగా, మహేశ్‌కు తండ్రి శంకరయ్య, తల్లి లక్ష్మి, భార్య స్వర్ణలత, కుమారుడు, కూతురు ఉన్నారు. దీనిపై హాజీపూర్‌ పోలీసులు కేసు నమోదు చేసి దర్యాప్తు చేస్తున్నారు.