చెట్ల పొదల్లో శిశువు.. అందుకే వదిలించుకున్నారా ?

ఆడపిల్ల అంటే చిన్న చూపు ఇంకా పోవడం లేదు. అమ్మాయిలు అన్ని రంగాల్లో మగవారితో సమానంగా దూసుకుపోతున్నా.. ఇంకా కొన్ని చోట్ల ఆడపిల్ల పుడితే వద్దనుకుంటున్నారు. అమ్మాయిని భారంగా భావిస్తున్నారు. తాజాగా నిర్మల్ జిల్లాలో ఆడశిశువును చెట్ల పొదల్లో వదిలి వెళ్లిన దురదృష్టకరమైన ఘటన చోటు చేసుకుంది.

జిల్లాలోని కుబీర్ మండలంలో ఈ అమానుష ఘటన జరిగింది. గుర్తు తెలియని వ్యక్తులు ఓ పసికందును చెట్ల పొదల్లో పడేశారు. అటుగా వెళ్తున్న ఓ మహిళకు చెట్ల పొదల నుంచి శిశువు ఏడుపు వినిపించింది. దీంతో వెళ్లి చూడగా అక్కడ ఆడశిశువు పడి ఉంది. వెళ్లి గ్రామస్తులకు విషయం చెప్పింది. దీంతో ఆ గ్రామ పెద్దలు వెంటనే పోలీసులకు సమాచారం అందించారు. ఘటనా స్థలానికి చేరుకున్న పోలీసులు పసికందును బయటికి తీయించి ఆస్పత్రికి తరలించారు. కాగా ఈ విషయానికి సంబంధించి పూర్తి వివరాలు తెలియాల్సి ఉంది.