Adilabad: డీసీఎంను ఢీకొట్టి ఎల్పీజీ సిలిండర్ల లోడ్‌తో వెళ్తున్న లారీ బోల్తా..

Adilabad: ఆదిలాబాద్ పట్టణ శివారులో పెద్ద రోడ్డు ప్రమాదం సంభవించింది. మావల బైపాస్ వద్ద శుక్రవారం ఎల్‌పీజీ సిలిండర్ల లోడ్‌తో వెళ్తున్న లారీ.. ఎదురుగా వస్తున్న డీసీఎంను ఢీకొట్టింది. ఈ ఘటనలో లారీ అదుపుతప్పి బోల్తాపడింది. దీంతో లారీలో ఉన్న సిలిండర్లన్ని రోడ్డుపై చెల్లాచెదురుగా పడిపోయాయి. ఈ క్రమంలోనే లారీ కాస్తా రోడ్డుపై ఉన్న తాగునీటి పైప్‌లైన్‌‌పై పడటంతో అది పగిలిపోయింది. ఓ వైపు రోడ్డు మొత్తం సిలిండర్లు.. మరోవైపు పైపు నుంచి ఉబికి వస్తోన్న నీటి ప్రవాహంతో.. జాతీయ రహదారిపై కొద్దిసేపు వాహనాల రాకపోకలు నిలిచిపోయాయి. సుమారు గంటపాటు పైపులో నుంచి నీరు ప్రవహించడంతో వాహనదారులు తీవ్ర అసౌకర్యానికి గురయ్యారు. ఈ ఘటనతో రహదారిపై పెద్దఎత్తున ట్రాఫిక్ జామ్ అయ్యింది.సమాచారం అందుకున్న పోలీసు అధికారులు ఘటనాస్థలికి చేరుకుని పరిస్థితిని అదుపులోకి తీసుకొచ్చారు. ట్రాఫిక్‌ను క్లియర్ చేశారు. రోడ్డు మీద పడిపోయిన సిలిండర్లను మళ్లీ లారీలోకి లోడ్ చేశారు. అయితే అంతకంటే ముందే నీటి లీకేజీని నిలిపివేశారు. ఈ ప్రమాదంలో ఎలాంటి ప్రాణనష్టం జరగలేదు. అయితే.. ఆ లారీలోని ఎల్పీజీ సిలిండర్లు.. ఖాళీవి కావటంతో ఎలాంటి ప్రమాదం జరగలేదు. లేకపోతేనా.. పరిస్థితి ఊహించుకోవడానికి భయంకరంగా ఉండేది.

• Read More Telangana News and Telugu News