విషాదం.. గంటల వ్యవధిలో అన్నదమ్ముల మృతి

ఒకేసారి ఇద్దరు అన్నదమ్ములు మరణించడంతో ఆ కుటుంబంలో విషాద ఛాయలు అలుముకున్నాయి. తమ్ముడు గుండె పోటుతో చనిపోయాడన్న వార్త విని అన్న గుండె కూడా ఆగిపోయిన సంఘటన మంచిర్యాల జిల్లా లక్షెట్టిపేటలో చోటుచేసుకుంది. ఇద్దరు అన్నదమ్ములు గుండెపోటుతో మరణించడంతో కుటుంబ సభ్యులు, బంధువుల రోదనలు మిన్నంటాయి.

వివరాల్లోకి వెళ్తే.. లక్సెట్టిపేట పట్టణానికి చెందిన గాజుల భాస్కర్ గౌడ్ (47) గుండె పోటుతో జగిత్యాల జిల్లా ధర్మపురిలో మృతి చెందాడు. తన తమ్ముడు భాస్కర్ గౌడ్ మృతి చెందాడని తెలుసుకొని శ్రీనివాస్ గౌడ్, భాస్కర్ గౌడ్ మృతదేహం చూసేందుకు వెళ్లాడు. అక్కడ ఒక్క సారిగా కుప్ప కూలి పడిపోయాడు. అయితే వెంటనే అతడిని ప్రభుత్వ ఆస్పత్రికి తరలించగా గుండెపోటుతో మరణించాడని వైద్యులు తెలిపారు. ఒకే ఇంట్లో ఇద్దరు అన్నదమ్ములు గంటల వ్యవధిలో గుండెపోటుతో మృతి చెందటంతో వారి కుటుంబంలో విషాద ఛాయలు అలుముకున్నాయి. పూర్తి వివరాలు తెలియాల్సి ఉంది.